USUTHU LUTHI IXOXO UMAZIGXUMELE KWI-BAY FC
NHLANHLA HUDLA
UFUNA ukuhlikihla usawoti esilondeni seRichards Bay FC uPablo Martin ongumqeqeshi wamaZulu FC abuyise isithunzi sawo ethela othulini iChippa United ngo-2-1 emdlalweni weDStv Premiership obuseMoses Mabhida Stadium, eThekwini, ngoMgqibelo.
USinoxolo Kwayiba ushayele izivakashi igoli ngomzuzu ka-8 ngaphambi kokuba uTshepang Moremi adedele inguzunga esukumise wonke umuntu enkundleni ngoka-65, kwathi uHendrick Ekstein – ovutha engabaselwe kulezi zinsuku – washaya iphenathi yokunqoba ngesikhathi esengeziwe.
Ekhuluma emuva kwalo mdlalo uMartin, uncome indlela abadlali bakhe abakhombise ukuzinikela ngayo phezu kokuba bephuma ebunzimeni bemidlalo emibili abayigijime ne-Orlando Pirates abehlulwe kuyona yomibili – oweNedbank Cup noweligi.
“Ngikholwa wukuthi abadlali bami bebekudinga ukunqoba lo * mdlalo njengoba bekhombise intshisekelo kule midlalo emibili edlule, nakuba singakwazanga ukuthola imiphumela emihle kuyona.
“Yize senze iphutha umdlalo usaqala kodwa sikwazile ukubuya silwele ukunqoba, okuyinto ebesiyidinga kakhulu.
“Isifiso sethu wukuqhubeka nokusebenza kanzima ukuze sibeke ikilabhu endaweni ehloniphekile.
“Siwubheke ngabomvu umdlalo wethu neRichards Bay. Ngifuna ukukubeka kucace ukuthi kawukho umusa esizobenzela wona ngoba nathi siyawadinga amaphuzu.
“Ixoxo nexoxo umazigxumela. Ofuna amaphuzu kuzofanele awasebenzele,” kusho lo mqeqeshi.
USuthu luzogadulisana neBay, elengelwa yizembe, kusasa ngoLwesibili ngo-19h30 eKing Zwelithini Stadium, eMlazi.
IChippa iqede umdlalo ingasaphelele ngemuva kokuba uRoscoe Pietersen ethole ikhadi elibomvu emuva kokukhuluma kabi ekhala ngephenathi etholwe wuSuthu, edaleke ngesikhathi uCelimpilo Ngema ewa ebhokisini.
Imidlalo yeDStv Premiership ephakathi nesonto iqhathwe kanje:
NAMUHLA NGOMSOMBULUKO
ELoftus: Mamelodi Sundowns vs TS Galaxy 19h30.
KUSASA NGOLWESIBILI E-Athlone: Cape Town Spurs vs Polokwane City 19h30.
EKing Zwelithini: Richards Bay vs AmaZulu 19h30.
NGOLWESITHATHU E-DHL Stadium:
Cape Town City vs Orlando Pirates 15h00.
EBuffalo City: Chippa United vs Moroka Swallows
15h00.
EDanie Craven:
Stellenbosch vs Golden Arrows 17h30.
EHarry Gwala: Royal AM vs SuperSport United 19h30. NGOLWESINE E-FNB: Kaizer Chiefs vs Sundowns 19h30.