IPirates ishiye kukhalwa eKZN
Iwashaya sengathi iyabukisa amakilabhu akulesi sifundazwe
I-ORLANDO Pirates ishiye kukhalwa KwaZulu-Natal ngokuvulela isibhaxu esesabekayo emakilabhini akhona kule nyanga ephelayo, uMbasa (April). IBucs iqinise amathuba ayo okuyodlala iCaf Champions League ngesizini ezayo ixebula iRoyal AM ngo-4-0 koweDStv Premiership izolo ngeSonto ntambama eHarry Gwala Stadium, eMgungundlovu.
Lo mphumela welama emibili lapho iBucs igaxe khona AmaZulu FC induku kabili, kuba ngu-4-2 kwiNedbank Cup no-1-0 kwiligi, kanti ngaphambi kwalokho yabukisa ngeGolden Arrows iyitaxa ngo-7-1 ngempelasonto yokuqala kaMbasa.
Amagoli iPirates elobole ngawo i-AM abekwe enethini nguPatrick Maswanganyi, obekuyiphenathi ngomzuzu ka-29, nguThalente Mbatha ngoka-56, nguRelebohile Mofokeng ngoka-76 noKabelo Dlamini ngoka-81.
Kulo mdlalo uMofokeng ubecanasa kubadlali be-AM basemuva.
Iphenathi etholwe yiBucs ize ngemuva kokuba uSbusiso Magaqa edlalise kabi uMonnapule Saleng, obengekho ebhokisini, kodwa unondweba wenza iphutha, walikhomba emlotheni.
USedwyn George we-AM wehlulwe wuqekelele umdlalo usanda kuqala.
UJohn Maduka opheka i-AM ukhale ngonondweba athi ubahlinzele ezibini ngokunika iBucs iphenathi “kungafanele”.
Uthi abadlali bakhe bakwenze konke enkundleni, kwasho khona ukuthi bekungelona usuku lwabo.
“Okubi wukuthi nonondweba ubemanqika ukuyibeka iphenathi.
“Kangikholwa ukuthi isigameko senzeke ebhokisini. Ngiyazi ukuthi nabo (onondweba) bayawenza amaphutha.
“Okubalulekile manje kithina wukubheka imidlalo ezayo. Kufanele sizishayele iSuperSport United ngoba sisenalo ithuba lokungena kwiTop 8,” esho.
UJose Riviero, ocija iPirates, uthe bathwale kanzima ngesiwombe sokuqala.
Nokho ubancomile abadlali bakhe ngokugcina umgqigqo wokunqoba. Uthe ngesiwombe sesibili bebengcono kakhulu.
“Siyajabula ngokunqoba.
“Manje sibheke imiphumela yethu, kasikubhekile (kangako) okungaphandle. Kufanele siyehlule iCape Town City phakathi nesonto,” esho.
Uthi okuhle ngezakhe wukuthi seziyakwazi ukusebenzisa amathuba eziwatholayo.
“Ngiyababongela abadlali nabalandeli abafike ngezinkani kulo mdlalo,” kusho uRiveiro.
Uthe uThalante ukhombisa izimpawu zokuvuthwa.
Kulo mdlalo kuthiwa kubanjwe umuntu edayisa amathikithi
awumbombayi, wakhalelwa ngamasongo kaSigonyela.
* Isiyonke imiphumela yeDStv Premiership imi kanje: Cape Town City 1, Arrows 1; AM 0, Pirates 4; Stellenbosch 5, Polokwane 0; Chiefs 2, SuperSport 1; AmaZulu FC 2, Chippa 1; Galaxy 2, Swallows 1; Spurs 1, Bay 0.
* EyeMFC imi kanje: Gallants 3, Platinum 0; Casric 0, JDR 1; Milford 0, La Masia 0; Magesi 0, Maritzburg 2; Lions 1, Baroka 2; Venda 0, Tuks 0; Leopards 3, Orbit 0; Callies 1, Upington 1.