I-DA IJIKE UMQONDO IKHAHLELWA YI-SABC NGESIKHANGISO SOKHETHO
IQEMBU eliphikisayo iDemocratic Alliance (DA) lethule isikhangiso salo sokhetho esisha esizongena esikhaleni salesi ‘obekushiswa’ kusona ifulegi laseNingizimu Afrika – esenqatshwe yiSABC ngeledlule.
Lokhu kwenzeke ngoMgqibelo emkhankasweni waleli wembu obizwa ngeRescue KZN, obuseCurries Fountain Sports Development Centre, eThekwini.
Ngeledlule iDA ibe sematheni kuvela isikhangiso sayo sokhetho ebesiveza ifulegi lakuleli lisha.
Leli qembu lathi lesi sikhangiso siwuphawu lokuwa kwezwe nesexwayiso somonakalo ozokwenzeka uma izakhamizi zakuleli zingayivoteli iDA, ezozikhulula.
I-SABC yathi ngeke isidlale lesi sikhangiso emoyeni.
Lokhu kwasusa umsindo njengoba inhlangano ecwaninga ngezindaba iMedia Monitoring Africa (MMA) ngokubambisana neThe Campaign for Free Expression (CFE) neSOS Support Public Broadcasting Coalition, bakhipha isitatimende begxeka isenzo seSABC, beyisola ngokucindezela ilungelo leDA, lokukhuluma ngokukhululeka.
Isenzo seDA sathinta noMengameli Cyril Ramaphosa, njengoba azwakalisa ukungenami kwakhe ngaso.
KwiRescue KZN, umholi weDA kuzwelonke uMnu John Steenhuisen, wethule isikhangiso esimveza ehambela izakhamizi zakuleli, kuzwakala izwi lakhe likhuluma ngokungenami kwazo (izakhamizi).
Siveza ukuthi izakhamizi sezikhathele yizethembiso ezingekho, nezinkinga ezingalungiswa, kodwa iDA iyisixazululo.
“Yinina enibe ngabokuqala ukusibuka lesi sikhangiso esikhombisa ngokusobala ukuthi yiDA kuphela iqembu elinganikhulula, linilethele ushintsho.
“Thina sisebenzela ukuthuthukisa impilo yenu, kasibangi amavoti njengezinye izinhlangano zepolitiki,” esho.
IMeya yaseMngeni, egaqele isikhundla sobundunankulu eKZN, uMnu Christopher Pappas, ithe ubuholi beDA buzolwela impilo engcono kuzona zonke izakhamizi zaKwaZulu-Natal.
“Amandla ngawethu, masiwasebenzise ngendlela ngomhla ka-29 kuNhlaba (May),” kusho uPappas.