Kufezeke iphupho kumlingisi ngokudlala nengwazi kuMuvhango
UMLINGISI ukuchaza njengokufezeka kwephupho ukulingisa nomlingisi osemnkantshubomvu, uNat Ramabulana olingisa indawo kaTenda emdlalweni wakumabonakude iMuvhango, otshengiswa nsuku zonke ngo- 21:00 kwiSABC 2.
Le ntokazi enguSbongokuhle Nkosi izakhele ugazi ngesikhathi ilingisa kuZalo nakwiDurban Gen. Iqale ukubonakala izolo ngoLwesithathu kuMuvhango. Ichaza ngendawo eyilingisayo, ithi kayibanga lula ngenxa yokuthi yangena esikhaleni somuntu obeseqashiwe.
“Bekunzima ngoba ngafonelwa ngeSonto kumele ngiqale ukushutha ngoMsombuluko ekuseni.
“Isikhathi sokuthi ngizilungiselele saba sincane kakhulu, ngangakwazi ukucwaninga kahle ngendawo obekumele ngiyidlale,” esho. KwiMuvhango ulingisa indawo kaRazia, ofike ngokushushunjiswa evela eSudan, eze ngomsebenzi wokuzogada ingane kaTenda. Kuhambe isikhathi agcine esezama ukuthi athole umsebenzi wasehhovisi ukuze abe nempilo engcono.
Elandisa ngokusebenza kulo mdlalo okukhulunywa kakhulu kuwo isiTshivenda, uthe akazange akuthole kunzima. “Bangamukele ngezandla ezifudumele, akuzange kube nenkinga yokuthi ngingumZulu. Ngaphezu kwalokho ngibe nenhlanhla yokuthi indawo engiyilingisayo kukhulunywa nami ngesiNgisi futhi nami ngikhuluma sona. “Nakuba kunjalo, ngizimisele ngokuthi ngibe sengikwazi ukukhuluma isiVenda, ngibingele ngithi Ndaa,” esho ehleka. Uthi indawo ayilingisayo kayihlukile kangako kuyena. “URazia ungumuntu ophaphile kanti nami nginjalo. Ungumuntu onezibazi ngenxa yendlela afike ngayo,” esho. Indawo yakhe uthi izobuye ishube uma sekuqala isizini elandelayo, lapho uRazia ezothola uthando, luphinde lumphunyuke. Le ntokazi ithi ikhuza ibuya kuZalo, izoqhubeka nokulingisa indawo kaNdoni. Ithi izobonakala nakwi-movie ebizwa nge-Okwama-Last, ezotshengiswa maduze kuMzansi Magic.