Yeyiphi le mfundiso ibhetele?
BHOTANI mawethu, ndibuye ndakho kwakhona apha entsimini. Kuninzi okufunjethwe lunqulo lwesiNtu okungasisisombululo kwintlalo yamaAfrika kule mihla.
Uluntu olukhoyo lubonakala luqakatha ukugqala undonakele kwintlalo yethu.
Ukanti ukuba besilulanda emva olu luchwe lusithe mbende, noko besiya kuba nako ukuthabathela entweni. Mhlawumbi uhlobo esisombulula ngalo beluyakutshintsha.
Mhlawumbi besingayi kuyinanza yonke laa mfundiso ize nohlanga oluphaliweyo.
Mhlawumbi besiya kuthi siyithatha inxalenye yemfundiso leyo, sibe sikokose ukungangqutywa kwisiseko senkolo yethu, intlonipho. Izenyeliso ezifike nomkhosi wemithika zombe umngxuma esoyele kuwo isizwe esiNtsundu.
Tyhini madoda! Ndiyakuthini kaloku ukuthetha ndinganazisanga ngendithethela phezu kwako. Apha ndiza ndiniphathele incwadi ethi, Enyeleni YesiNtu. Yincwadi le ebhalwe ngosiba lukaB.B. Mkonto neyashicilelwa okokuqala phaya ngomnyaka ka1997. Ipapashwe ngabakwaVivlia Publishers & Booksellers.
Kuncwadi esinalo yenye inkalo esilambatha kuyo le kubhalo lwesiXhosa, ukubhala ngeNkolo yesiNtu. Ke lo kaMkonto uzidinile washicilela olu hlobo loncwadi. Manditsho ukuthi, xa uncwadi olumilise okwanje ngolu wasiphathela lona okaMkonto lwalubhalwa, yaye rhoqo, ngekukuninzi esikwaziyo ngathi bantu baNtsundu.
Kaloku inkolo le ihamba kunye nenkcubeko, ngoko ithi enye isakuchaseliswa kwenye kuqale kubekho ukungayondelelani kwezinto.
Imfundiso ngobuAfrika besiyakuyazi nzulu xa besiyigqalile laa nkolo yonqulo yamaAfrika, sisenyeleni ke ngoku. Kukule nkolo nonqulo lwamaAfrika apho imbali ibekwa esililini.
Andithi xa amathile xa ephethe isiko kwimisebenzi yonqulo lwawo, kufuneka kulandwe umnombo kwanembali yekhaya, kulapho kuye kuthiwe khankqu abantu ababekho belo khaya, le nto sithi ziziduko.
Khawucinge nje, ngesiphi ngenkqubela yokuzazi ngcono xa sasinga
xokiswanga zizenyeliso ezenza yalizothe into yonqulo lwamaAfrika? Andithi inkolo yamaAfrika ichazwa njengonqulo lwezinyanya ngabantu abenyelisayo.
Yimfundiso engaqiqwanga ke leyo kuba zonke iinkolo zinqula uMdali.
Noxa okaMkonto kule ncwadi yakhe ebhale ethelekisa inkolo yesiNtu nenkolo yobuKristu nelunqulo esafundiswa lona, ubonakala ekwamkela ukulunga kwenkolo yesiNtu.
Noko kunjalo akachasananga neyobuKrestu. Isikhalo sikaMkonto kukubhanga kwentlonipho eluntwini nto leyo yayisesililini yenkolo yesiNtu.
Uthi, AmaAfrika aguquke azizilwanyana, esenza umzekelo wento eyayingekho phambili phaya, ukutshiswa komntu ephila. Asikokwenza kwamaAfrika okunjalo, lisikizi nehlazo esizweni siphela elo. Noxa imikhwa efana nale mpoxo sendiyikhankanyile seyenile nje, mayazeke into yokuba ingumgqakhwe kwindlu eNtsundu.
Inkolo yookhokho yakheka phezu koBuntu nobuthiwe thande yimbeko nentlonelo.
Lunqulo lwamaAfrka olwanyenjwa lwayile nto luyiyo namhlanje. Abantu balo balonyanya ngokungathi linyala. Tsii kudlaliwe ngathi maAfrika kodwa!
Ukusuka umntu azonyanye de angafuni nento le emsondeza kwinkcubeko yakhe. Xa kunje,