Vela bahleke
Ye madoda kumnandi eMzantsi Afrika andazi nokuba ndim ndodwa na obona ngolo hlobo.
Ndothuke ndaphantse ukuwa xa bendikwintlanganiso yabazali kwisikolo esifunda unyana wam, kubekho into ethi makhe ndijonge kunomyayi wam ukuba zithini iindaba ezintsha.
Kaloku ndingumntu apha ozithandayo iindaba andifuni kushiyeka ezintweni, xa ndithi, gqi ngombhalo othi “INKUNDLA YOMGAQOSISEKO IGQIBE NGAZWINYE KWELOKUBA INTSANGU UMNTU ANGAYISEBENZISA EKHUSINI HAYI ESIDLANGALALENI, KWAYE ANGAZITYALELA ISIXA ESITHILE UKUZE AZISEBENZISELE HAYI NGEENJONGO ZOKUYITHENGISA.” – ndiyifundisise kaninzininzi le nto ndizama ukuqiniseka ukuba ndifunda kakuhle na, ndabe ndifunda kakuhle. Ndize kule ndithi kumnandi eMzantsi, kuthe kungaphelanga neyure esi sigwebo siphumile kwabe kusisisi sentsangu nje emafini oMzantsi Afrika, ingulowo nalowo ebhiyozela ukukhutshwa kwesi sigwebo ngokutshaya lo mthunzi weenkukhu.
Nam lo benditshayile ngoku ndingatshayanga ngenxa yokuba umoya ebesiwuphefumla ngala mini ubuphithikezwe ngentsangu!
Xa ndibuya kule ntlanganiso bendikuyo ndifika kwisiphambuka esinophawu lokuba uqala ngokumisa phambi kokuba udlule xa kukhuselekile ukwenza oko.
Nako ndime emva kwale moto ime ngxi kangangemizuzu emihlanu, ndincame ndihle kuba ndingumntu othanda ukunceda xa umntu esengxakini.
Ndifike ndankqonkqoza efestileni ndifuna ukuqonda ukuba ingxaki yakhe yintoni engade ahambe nje, awunakuyikholelwa impendulo endidibene nayo: “MNUMZANA, NDISALINDE OLU PHAWU LUBOMVU LUBHALWE MANDIME LUDE LUJIKE LUTHI MANDIHAMBE,” – kanti unkabi utye intsangu ucinga ukuba yirobothi le ame kuyo. Ndiyakuxelela zininzi izinto endidibene nazo.
Ndifika ekhetshini ndisiya kumgangatho ophezulu kwezi ofisi bendize kuzo. Nako ivuleka ikhetshi kuvele kube mhlophe, ndingene ndicinga ukuba akukho mntu, xa ndisemnyango ndigilana ngqo nomntu ophumayo, “NJANI BENDICINGA UKUBA ANDIBONANGA MNTU NJE, XA NDINGENA KANTI OKU KUBA MHLOPHE NGUMSI WENTSANGU!”