IRed Bull ibanika iimpiko zoshishino
OYINXALENYE nenkqubo yokuphuhlisa oosomashishini abasebatsha nabasakhulayo iRed Bull Academy, uPalesa Mahlatji waseMdantsane, nobemele iMpuma Koloni ngo2017, uthi kumnike iimpiko zoshishino ukuzibandakanya nale nkqubo.
UMahlatji ngomnye woosomashishini abasebatsha abenza utshintsho kwiindawo zoluntu.
Le nzwakazi yiyo eyavelisa inkqubo yokuncedisa kwanokuza necebo lokunceda abantwana basemaphandleni kuquka nolutsha ngobuxhakaxhaka banamhlanje ayibiza ukuba yiSolar Computer Lab in a Bag.
Uthi amagumbi abo apho baqeqeshela khona ulutsha aseHighway eMdantsane, ukanti uthi bayakwazi nokuzityelela izikolo befundisa abantwana ngezakhono zekhompyutha.
UMahlatji uthi imkhulisile inkqubo yakwaRed Bull Amaphiko Academy kwezoshishino kwaye imxhobise nangakumbi.
Uthi unqwenela ukuba babe khona nabanye abantu abatsha abafunda nto kuye.
Uthi kule imihla okubalulekileyo kukungaxhomekeki mntwini okanye usonge izandla.
IRed Bull Amaphiko Academy ukulungiselela unyaka ozayo iza kube iseThekwini ukusukela ngomhla weshumi elinesithandathu kule inyanga sikuyo uyokutsho ngomhla wamashumi amabini anesithathu kuCanzibe ngo2019, apho kuza kube kukhangelwa kukwachongwa abo beza nobuchule kwimiba yezoshishino.
Le nkqubo yokuphuhlisa oosomashishini abakhulayo iqale ngonyaka ka2014. Kwiminyaka edlulileyo iRed Bull Amaphiko Academy ibijonge ikakhulu kwitalente yeemvumi, abadlali kwakunye nabadanisayo.
Abo banomdla wokungenela le nkqubo kwaye banemibono, sele iqalile, ungathi utyelele kumnatha Red Bull Amaphiko Academy Applications 2019.