Amangcwaba eenkosi zamaQwathi namaXesibe Iza kuyeka ukuba likomkhulu lobundlobongela iNyanga
KWAMKELWE ngezandla ezishushu ukuvulwa kwesikhululo esitsha samapolisa eSamora Machel nekukholelwa ukuba siza kuphungula umthwalo kwisikhululo saseNyanga, edume ngokuba likomkhulu lobundlobongela kwihlabathi.
UMphathiswa wamaPolisa uBheki Cele uvule isikhululo samapolisa esiza kuba namapolisa angama116 nezithuthi ezingama54 kwisikolo samabanga aphakamileyo iSophumelela ngoLwesibini. Ebekhatshwa nguMkomishinala wamaPolisa uKhehla Sitole noMkomishinala wamaPolisa kweli phondo uKhombinkosi Jula.
Esi sikhululo kudala salindelwa ngabahlali. Emva kokuba iNyanga yabhengezwa njengekomkhulu lobundlobongela, kwenziwa uphando olwafumanisa ukuba isikhululo samapolisa sinoxanduva olungapha kwaso nanjengoko zininzi iindawo ezixhomekeke kuso.
Owayesakuba nguMphathiswa wamaPolisa uFikile Mbalula wachazela inginginya yabahlali baseNyanga, eZolani Centre, kweyeDwarha kulo nyaka uphelileyo ukuba siza kwakhiwa isikhululo saseSamora Machel kwaye sele siboniwe nesiza.
Ukususela ngoko, oko abahlali bale ngingqi yambethwe bubundlobongela balindela esi sikhululo.
Evula esi sikhululo ngokusesikweni, uCele utyikitye isifungo asifundele oonondaba esithi: “Luvuyo kum ukuvula esi sikhululo sitsha esiza kunceda abahlali bale ndawo abangama40 000 ukususela namhlanje. Esi sikhululo siza kuba namalungu angama116 nezithuthi ezingama54 eziza kusetyenziswa ukukhusela ubomi babahlali,” waze watyikitya.
UCele uxelele abahlali ukuba, ukuba bebenendlela yabo beziza kuba nezikhululo zonke izitalato zaseNyanga. “Sifuna iphele into yokuba iNyanga ibelikomkhulu lobundlobongela,” utshilo.
Usihlalo weCPF yaseNyanga uBuyisile Makhasi, uthe siza kwenza umahluko esi sikhululo kubahlali balapho ekunyanzeleka ukuba baqeshe izithuthi besiya eNyanga, besiyela izinto ezifana nokugunyazisa izazisi.
“Iza kucuthela amapolisa aseNyanga umsebenzi. Iza kuphela intsokolo yokuqesha izithuthi ngemali abangenayo abahlali balapha.”
Umhlali waseSamora, uAngelina Mtalane, 63, uthe: “Kudala sasokola apha, sikhwela sisiya eNyanga. Into ebuhlungu yeyokuba sifike zingekho izithuthi zamapolisa apho. Kudala sasidinga isikhululo samapolisa kule ngingqi. Siza kutsho sikwazi ukunqanda ubundlobongela busenzeka. Kaloku thina ubukwazi ukuyibona into isenzeka kunyanzeleke ufowunele eNyanga. Xa efika amapolisa ibe ngathi zange kwenzeka kwanto.”
Omnye umhlali, uLuvo Stofile, uthe uyakwamkela ukufika kwesikhululo, esithi kuza kwehla nezinga lokuqhekeza eSamora.
“Kaloku bayayazi ukuba zikude iiveni zamapolisa. Ziza kutsho zizulazule nalapha ezitalatweni ngoku. Lo nto iza kwenza bacinge kabini abo bathanda ukuqhekeza izindlu zabantu,” utshilo.
Ngokweenkcukacha zobundlobongela zalo nyakamali, kubulewe abantu abangama308 eNyanga ukususela kwekaTshazimpuzi ukuza kuma kweyoKwindla kulo nyaka.
Elo nani lelona liphezulu kwizikhululo zonke zaseMzantsi. Kufunyaniswe ukuba kubulawa abantu abangama57 ngosuku.