Ukusasazwa kwamapolisa kunocalucalulo
INKUNDLA yezokulingana (Equality Court) ibhengeze ukuba ukusasazwa kwamapolisa kunocalucalulo obuhamba nobuhlanga nendlala, nto leyo eyithathe njengempumelelo iSocial Justice Coalition (SJC) yaseKhayelitsha neeCPF zasezilokishini zabantsundu.
ISJC, iEqual Education neCPF yaseNyanga zabhenela enkundleni yezokulingana kweyoKwindla ngo2016 ukuya kweyoMdumba kulo nyaka zicela ukuvunyelwa ukuba zibandakanywe xa kusasazwa amapolisa.
Ude wafezekiseka umnqweno wabo nanjengoko inkundla ifumanise ukuba ukusasazwa kwamapolisa kunomkhethe.
Umbandela wamapolisa kudala watshisa ibunzi eKapa. Ngo2014 iNkulumbuso yeli phondo uHelen Zille waseka iCommission of Inquiry into Policing ukuze iphande unobangela wokuba abantu baseKhayelitsha bazithathele umthetho ezandleni zabo. Le komishini neyayikhokhelwa ngujaji Kate O’Regan noVusi Pikoli yafumanisa ukuba abahlali abawathembi amapolisa.
Isizathu sokusekwa kwale komishini yayiziziganeko zokubulawa kootsotsi betshiswa ngamavili eKhayelitsha.
Waphinda waba ngundabamlonyeni umcimbi wamapolisa ngo2016 emva kokuba kwafunyanwa umzimba kaSinoxolo Mafevuka kwizindlu zangasese koSST eSite B eKhayelitsha.
Kwiveki elandelayo kwafunyanwa umzimba kaFranziska Blochliger ehlathini laseTokai.
Kwathatha iiyure ezingama-36 kuphela ukubamba ababulali bakaBlochliger. AbakaMafevuka abakafunyanwa kunanamhlanje.
Ijaji yeNkundla yezokulingana uMJ Dalamo uthe: “Ukusasazwa kwamapolisa kunocalucalulo obuhamba ngobuhlanga nendlala.”
Ilungu leSJC, uDalli Weyers uthi yimpumelelo enkulu le. “Kudala siyithetha into yokuba ukusasazwa kwamapolisa kunomkhethe ingakumbi kwiilokishi zabantu abathwaxwa yindlala. Jonga izikhululo zamapolisa ezifana neNyanga enezinga eliphezulu lobundlobongela sinamapolisa amancinci kunezo zikwindawo zabantu abanemali ingakumbi abamhlophe. Sonelisekile sesi sigwebo. Inkundla ifumene kanye le nto yafunyanwa yikomishini yaseKhayelitsha.”
ISJC ithe izakuphindela enkundleni kwakhona kulo nyaka uzayo bayokuxoxa malunga nesi sombululo.
Ilungu leCPF yaseNyanga uBantu Solakhe uthe into eseleyo ngoku kukuba ingenelele ngokwayo kumba wokusasazwa kwamapolisa.
“Urhulumente wethu usaqhuba ngala ndlela indala. Isekude kuthi inkululeko. Ungathi ukhululeke njani ungakhuselekanga. Sinabantu abaninzi kwiilokishi zethu kodwa amabalwa amaploisa. Jonga inginginya yabantu baseKhayelitsha,” utshilo.
Umphathiswa wezokhuseleko eNtshona Koloni uAllan Winde naye usamkele esi sigwebo.
“[Bheki] Cele, akufuneki ulinde inkundla ikunike isisombululo. Kudala sakuxelela ukuba lifuna ukongezwa nge-4 500 inani lamapolisa. Kufuneka ongeziwe amapolisa qha kuphela. Ukuba awenzi njalo sizakubhenela enkundleni de uyenze okanye ususwe esihlalweni ukuba awuyenzi,” utshilo.
Isithethi samapolisa kuzwelonke uBrigadier Vish Naidoo uthe baseza kuqwalasela esi sigwebo.