Bakhululwe ngebheyile yeR2 000 abakhupha amaphepha wokuqhuba omgunyathi
BAKHULULWE ngebheyile yeR2 000 umntu ngamnye abo batyholwa ngokukhupha amaphepha wokuqhuba omgunyathi kwisikolo sokuqhuba, iKhayelitsha Driving Licence Testing Centre.
UPhumla Myedi (41), uPhelisa Kalipa (40), uLeticia Chatburn (44), uNwabisa Xozwa (39), uNwabisa Zotani (31), uZukiswa Ngqalo (41) noMbonisi Liwane (38) bakhululwe phantsi kwemiqathango eqatha emva kokuba bevele kwinkundla kamantyi yaseBelville.
Imiqathango yebheyile iquka ukuba bangabuyeli emsebenzini de kugqitywe ityala.
Kulindeleke ukuba bavele kwakhona enkundleni ngomhla weshumi elinesibini kweyoMdumba kulo nyaka uzayo.
Esi sixhenxe sabanjwa kule veki iphelileyo ngoLwesithathu bebanjelwa izityholo ezahlukeneyo eziquka ubuqhetseba nomgunyathi malunga nokukhutshwa kwamaphepha wokuqhuba nawokufundela ukuqhuba.
Uxwebhu lwezityholo lubonakalisa ukuba baqala ukwenza le nto ukususela kweyoMqungu ngo2015 ukuza kutsho kweyeDwarha kulo nyaka (2018).
Isithethi seHawks eNtshona Koloni, uPhilani Nkwalase, uthe nabo bantu bathi bafumana amaphepha okuqhuba omgunyathi abazokusinda ekutshutshisweni.