Ungaphoswa lulonwabo eQolorha kuCentane
ULUNTU lwedolophu yakuCentane luzakube lunomnyhadala wolonwwabo obizwa ngokuba yiBack To My Roots (BTMR) Festival ngoLwesithathu, 26 eyoMnga.
Lo ngunyaka wesithandathu iqhuba iBTMR. Nakulo unyaka izakubanjelwa kulwandle laseQolorha, kuCentane.
Umququzeleli walo mnyhadala, uZusakhe Noganta-Nohako, uthi izinto sele zime ngobume bakulungele ukusingatha uluntu.
Uthi sele bebona nakumatikiti ukuba abantu sele belungile njengoko ethengwa. UNogantaNohako uthe: “Unobangela walo mnyhadala kukukhuthaza nangakumbi italente kubantwana bomgquba abanganikwa mathuba. Oku ikwaziinzame zokubaqaqambisa nangakumbi kwaye ikwalilo nethuba lokuba sonwabise uluntu.” Ukwaqinisekise nokuba ukhuseleko luza kuba ngqingqwa abantu bangaxhali. Lo msitho uzakube ubhexeshwa nguSoso Rungqu, ongumlingisi kumabonakude kwinkqubo Isidingo, kwakunye noPastor woMhlobo Wenene FM.
Ukanti kwabo bakube bekhuphisana ngeengoma eqongeni singabalula abambalwa kubo abafana namaqela eMaskandi Amawele kaMamTshawe, Siyanda Dyonase, Bunolo noUnathi kwakunye nooDJ abaziwayo ekuhlaleni. Ubumnandi buqala ngentsimbi yeshumi kusasa uyokutsho ngeyesithandathu ngomhla wamashumi amabini anesithandathu.
Amatikiti ayafumaneka eComputicket nasemasangweni ngeR100 ukuya kwiR250.