Oonobangela bolwaphulo-mthetho
ULWAPHULO-MTHETHO luvela kwintlalo eyonakeleyo. Isitena esinye sentlalo yasebuntwini ngumzi.
Ke ukuqhwalela, ukuhexa nokungasebenzi komzi, kubanga ukonakala kwentlalo yobuntu, ngokungqalileyo. Zithi iingqondi ezifundele ukusebenza kwengqondo zezilwanyana ngokubanzi neyomntu ngokungqalileyo, ingqondo yomntwana igqibeka imilo yayo kwiminyaka emihlanu yokuphila.
Ngalo minyaka ke akakabikude kwiphiko lomzalikazi nokuba ungowesiphina isini. Xa ke iintsapho ekuhlaleni okanye esizweni zizeziphilileyo zimele ukuveza intlalo ephelileyo.
Intlalo ephilileyo yintlalo ekhulisa ubutyebi bomntu wonke. Intlalo ephilileyo yintlalo ephilisa abantu ngaphandle kwamaxhala okuba umntu uza kwenza njani na ukuze atye yena nosapho lwakhe. Intlalo ephilileyo yintlalo enezifo ezimbalwa nempilo yomzimba entle.
Intlalo ephilileyo yintlalo ethi ngokunqongophala kwezifo zomzimba, amaxhala nezingqala ezibangwa kukuswela nendlala bathi ngabanye balindele obomi obude.
Xa abantwana bevuka kusasa umama notata sele bephangele baphinde babuye esikolweni abazali besesempangelweni, baza kuqeqeshwa yintoni?
Lincinci ixesha lokuqeqesha kootitshala esikolweni, xa abazali bebuya emsebenzini bediniwe. Amaxesha amaninzi abazali abangootata bafika ekhaya bagqithe baye ezinkonzweni zangokuhlwa njengoko bona benganakuphekela bantu, njengamadoda.
Abanye baya kwiinkonzo zaseShwaqa bayokuzuza umthendeleko ongenamfundisi besithi bakhupha ukudinwa, bathi xa bebuyela ekhaya bafike sekwalalwayo.
Intlalo yengcinezelo eyaqala ngomhla wesithandathu kuApril ka-1652 yapheliswa ngo-1994 ibenzakalisile kakhulu ubuntu babantu beli lizwe, abamnyama nabamhlophe.
Andizukunaba ngabom kuba andifuni ukuthetha izinto abanye abantu abonokuzisebenzisa ukususa ityala kubantu abathile baliphose kwabanye abantu endaweni yokuba bazibhence bona, bazibuze ukuba konakala phi na sekunje nje nje, linokufumaneka phina ichiza lokunyanga lo mbolo wentlalo yabantu abamnyama selekudlule iminyaka engaphezulu kwamashumi amabini bezilawula ngokwabo. Yake yathi enye ingqondi yeengqondi eyakhe yakho apha emhlabeni “angayenza umntu ingxaki, isisombululo sayo sikwakuyo”. YayinguKarl Marx lowo.
Uhlobo lwentsapho yethu thina ma-Afrika asezantsi kweSahara lusapho olunabileyo hayi le siyinikwe bubukhoboka bomvuzo. Usapho lomyeni nenkoskazi yakhe nabantwana babo qha.
Usapho olunabileyo lunceda kakhulu kwinto eyakha, iphinde yomeleze, le nto ingumntu ngesitha senkxaso. Sithi isiXhosa “ukuzalwa wedwa ngumlu wenyama”.
Lo nto ithetha ukuba xa ungumntu ongahlangananga nabantu unguMthuz’mele, ngoku kaSteve Tshwethe, akumntu usisidungulwana senyama, kuba “umntu ngumntu ngabantu”. Bona ke ubudlelane bentlalo yanamhla, intlalo yobukapitali bufundisa ukuba “ungazixhoxhi igila ngenkukhu yaseNext door” okanye “oxhela eyakhe akabuzwa”.
Wathi unyana omkhulu ka-Adam uKayeni (Cain) akuba onile ngokugwinta abulale umninawa wakhe u-Abheli (Abel) ngenxa yomona waphendula uThixo ngombuzo wokuqaqadeka xa ebuzwa nguThixo, emlinga okuba angaxoleleka na esonweni sakhe ngokumbuza ukuba “uphina umninawa wakho?” waphendula uKayeni kuThixo wathi “ndingumgcini ka Abheli na?” Lo mpendulo kaKayeni kuThixo ibonakala kum isesisekweni sesono nalo lonke ulwaphulo-mthetho.
Umntu owaziyo kuba uphila kuba bephila nabanye abantu, owaziyo ukuba ungumgcini womnye umntu, angekhe awophule umthetho ngabom esazi ukuba abantu bahlalisene ngobuntu ngenxa yokugcina umthetho.
Xa abantu benganantlonipho yomthetho, abanantlonipho yobuntu, baxabise ubulwanyana babo obu benza ukuba benze imikhwa nemikhuba emanyukunyezi, imikhwa engenakwenziwa nazezizitho zine izilwanyana.
Masijongane ngqo nenyaniso yokuba indlela obenziwa ngayo ubutyebi elizweni nendlela obusasazwa okanye obabiwa ngayo zizo ezisisiseko solwaphulo-mthetho ngenxa yokuphela kokuzihlonipha kuba umntu engenasizathu sibhadlileyo sokuzihlonipha ngenxa yentlupheko nendlala. Anditsho ukuthi wonke umntu owaphula umthetho aphazamise ucwangco lwabantu wenziwa yintlupheko nendlala.
Akukho ntlupheko nandlala edlwengulisa iintsana namaxhegokazi. Kodwa ke kunjalo, mayigqame ezingqondweni zethu nezabalawuli bethu ukuba ingqondo engenanto yakwenza ilibala lokudlala likasathana.
Amazwe anomgangatho ophezulu wokuphila anje ngooCanada,iGermany, iDenmark nooSweden akanazo izigila mkhuba ezinje ngezi uzifumana kumazwe anje ngooSouth Africa nooNigeria.
OoCuba noLesotho, kwelobutyebi icala abasondelanga nakancinci kwiNigeria neSouth Africa kodwa kuba kula mazwe kungekho bantu baninzi baphila kukudla ukubila kwabanye abantu xa yena uThixo wayethe kuAdam noEfa umntu uyakudla ubila kwelakhe ibunzi.
Kula mazwe abukho ububi nobuhenyu bentlalo oyifumana eMzantsi Afrika. Komnye unyaka ndiseDenmark kwikomkhulu lakhona iCopenhagen, ndibuza umphathi wentolongo enkulu yakhona ukuba ngawaphi amatyala axhaphakileyo ezweni labo.
Impendulo yathi ngabantu abagwetyelwa ukonqena ngokuthi umntu athathe ibhayisekile yomnye umntu agoduke ngayo kuba ngexesha likatshayile emsebenzini ezifumene ekude nebhayisekile yakhe, “inqabe kakhulu enye into ezisa umntu entolongweni apha”, uphethe ngelo ukundiphendula umphathi wentolongo enkulu yaseDenmark phofu engayodluli kuyaphi iFleet Street Police Station yaseMonti ukuba iyayodlula ngobukhulu.
Abantu mabaxakeke ngokusebenza, bathi bakuba besebenzile banikwe imali abanokuphila baphilise ngayo.
Makungaxokwa ngokunqongophala kobugcisa ebantwini ababamnyama. Ukunqaba kwezakhono kubantu abamnyama kwadalwa ngabom ngoorhulumente bangaphambili kwalo wedemokrasi ka-1994.
Mabasebenze abantu lonke ixesha, basebenze ngobuninzi. Ukwenza ukuba abantu basebenze mayibe yephambili ingongoma kwinkqubo yokhuliso-ntlalo yoburhulumente.
Makuphungulwe ukusetyenziswa kwemitshini ngenjongo yokunqanda ukuphela kobugcisa nangenjongo yokwakha amaninzi amathuba emisebenzi.
Abantu mabangashiyi umhlaba ungasetyenzwanga phaya ezilalini baqhayise ngenkam-nkam negranti yabantwana, bashiye amakhaya bazokwakha amatyotyombe ezidolophini bazokongeza imbandezelo phezu kwenye. Ilokishi ayizange iqalise ukuba yindawo yempucuko nempumelelo.
Yindawo yokuqobeka ngomvuzo wobukhoboka. Urhulumente wethu makenze kulimo lweelali okuya kwenziwa yiNational Party kumafama amhlophe mhla yangena eburhulumenteni ngo1948.
Akusoze kwenziwe butyebi kumhlaba wasezilalini ngaphandl’ba urhulumente ufaka iibhiliyoni zeerandi kuphuhliso lolimo lokwenyani ezilalini
Ulwaphulo mthetho alunakuphela ngemithandazo. Lupheliswa kukukhuliswa nokuphuculwa kwentlalo.