Umama ona-69 ushiye abantu kwiHeroes Marathon!
UMNTU ngamnye unento ayithandayo ebomini bakhe. Yena umama uLiziwe Gxobole wakwaBhaca wazikhethela ukubaleka esemncinane, nangoku usabaleka.
Kwiveki ephelileyo, umama uGxobole, oneminyaka engamashumi amathandathu anesithoba – ebengomnye weembaleki ezingaphaya kwewaka ezithathe inxaxheba kwiHeroes Marathon eqale eQunu yayoqhina eWalter Sisulu University, eMthatha.
UGxobole ebengomnye wabantu abadala phakathi kwenyambalala yabantu abatsha abasafuna ukuzenzela udumo kwicandelo leembaleki.
Umama uGxobole uxelele I’solezwe lesiXhosa okokuba ukubaleka yinto esentliziyweni kuye kwaye yinto awakhula eyenza nasesikolweni.
“Ukubaleka yeyona nto endiyithandayo kakhulu. Ndiziva ndiphilile emzimbeni xa ndithe ndabaleka. Ndivuya kakhulu ngoba ndinazo zonke iimbasa zemidyarho yeembaleki yalapha eMpuma Koloni ngoba ndiyaphumelela. Ndakhula ndikuthanda ukubaleka. Kwasesikolweni, ukubaleka yayiyinto endiyithandayo. Ndiyavuya ngoba bendikhe ndaphumelela kumdyarho weekhilomitha ezilishumi kutshanje. Namhlanje ndikwazile ukuphumelela umgama oyi-21 km,” utshilo umama uGxobole.
Ecebisa abantu abatsha, le mbaleki yakwaBhaca ithe abantu mabakuthande ukubaleka futhi bangonqeni nokuya ezindaweni ngoba ukubaleka yinto eyakugcina imizimba yabo iphilile. UGxobole ufike entanjeni esenamandla futhi kubonakala wenza into ayiphilayo nyhani.