UFubesi noNjeza bazise iOpera yomgangatho eGcuwa
LUDLWABEBU lwentambula yeOpera ebisuka emazantsi kwiintliziyo zesibini sakuCentane, udlula nje kumanxila omculo weekwayara aseMnquma, usiya ngqo kwiNkosi yoxolo uThixo buqu.
Le konsathi ibizukile, isonwabisa, ibenza abathandi bomculo weekwayala, neOpera buqu, bahlale encotsheni yeenzwane zabo yoncuthu nomgangath0 ebisekezelwe kuwo.
Ibizwa njengeHomecoming Concert, olu ncuthu belubanjelwe kwityalike yamaWisile kwidolophu yaseGcuwa ngenjikalanga yangoMvulo, lukhokelwa ngumthuzimele wetena entyiloza kamnandi kaSipho Fubesi ekhatshwa nguSibusiso Njeza kwipiyano. Bobabini ziinzalelwane zakuCentane, ze bafunda eMsobomvu High eGcuwa apho uthando lwabo lomculo lukhule khona.
UFubesi ufundele umculo kwiYunivesithi yaseKapa phambi kokuba aye eRoyal Northern College of Music eManchester eNgilane apho waphumelela khona iPostgraduate Diploma kwizifundo zomculo. Yena uNjeza ufundele umculo eRhodes University.
Ebalisela I’solezwe lesiXhosa uFubesi uthe: “Sagqibela ukucula nalo mfana wakwaNjeza, kwikonsathi ekumila kunje, kwiminyaka elishumi eyadlulayo. Ngelo xesha kwakusithiwa ndlelantle kum ndisiya eManchester eNgilane ndiyokwenza iPostgraduate Diploma kwezomculo.”
“Ngoku into esizama ukuyenza kukuzisa le nto siyenza kula mazwe, siyizise ekhaya. Ukuba ungaya kwiCape Town Opera, uyakufumanisa ukuba amashumi asixhenxe ekhulwini (70%) yabantu abaphaya ngabaseMpuma Koloni.
“Enye into esiyifunayo kukukhuthaza abantu abatsha, ukuba babeyinxalenye nomculo weekwayala,” utshilo uFubesi.
UFubesi sele esuka kuntyiloza kumaqonga eOpera eFrance, eNgilane, eJamani naseRussia.
UNjeza uthi le konsathi banawo umdla wokuba inabele kwiMpuma Koloni iphela kodwa watsho eyibethelela eyokuba eGcuwa izakuhlala ihleli.
Uthi bavuyile ngumthamo wabantu abasabele kwikonsathi yabo. “Thina besilungele ukonwabisa abantu nokuba balishumi, kodwa abantu basothusile beza ngobuninzi babo. Sibulela kakhulu ngenkxaso.”