2018
WAKHE wawubona phi unyaka oqala ngemiphanga uyokuvalwa ngemiphanga?
Ukusukela kooHugh Masekela nooWinnie Mandela ukuyokutsho koosaziwayo bakumabonakude nezinye iimvumi. Sibhala nje kukwakho nenyhikitya yokubhubha kwabantu kwiingozi zendlela. Kuphinde kubekho nababhubha esuthwini.
Amakhwenkwe angaphaya kwamashumi amabini sele ebhubhile. Lilonke ibingunyaka nje wembubhane lo. Asazi ke ukuba u2019 uyakusiphathela ntoni kodwa sakuhlala ethembeni lokuba noko izinto zakuba bhetele.
Siqinisekile ukuba bakho abo bambona njengonyaka obumhle u2018. Asinakutsho sonke. Kwelethu icala, siliphepha, sigqibe unyaka wesine sipapasha.
Sipapasha iikopi ezingama-30 000 eMpuma Koloni jikelele. Sikwasungule nokusasaza eKapa kulo nyaka. IKapa lifumana iikopi ezingama-10 000 qho ngeveki, ngeR2.60 kuphela.
Sifumanise ukuba uninzi lwamaXhosa ahlala eKapa awakayazi kakuhle le yokuba liyafumaneka napha kwaye eli liya eKapa libanazo neendaba ezongezekileyo zaseKapa.
Kulo nyaka uzayo sakuzama ukuqinisa nokonyusa ukuthengiswa kwalo eNtshona Koloni. Noko, eMpuma Koloni, akho mntu ungalaziyo eli phepha.
Siyabulela ngenkxaso. Sikwabulela nakwabo basithumela iileta zabo rhoqo ngeveki. Nabo bathumela amaphupha. Nabo balithenga rhoqo eli phepha.
Umcimbi wamaphephandaba unzima kakhulu kule mihla ngoba iindleko zokupapasha nokuthutha iphepha zixhome kakhulu.
Uninzi lwamajelo osasazo abalekela kumnatha wonxibelelwano ngoku ngoba pha akho zindleko zokupapasha nezokuthutha iindaba.
Ingxaki ngomnatha wonxibelelwano yeyokuba akukho ngeniso ingako ibonakalayo. Ngoko ke nathi asiwujonganga kakhulu umnatha wonxibelelwano; sizimisele ukuqinisa iphepha eli uliphethe ezandleni zakho ngoku. Oka-2019 sakumvula ngesibhengezo sokuba ithathwe ngubani inkomo yokukhuphiswano lodumo! Emveni koko sinazise ngezicwangciso neenkqubo zethu zasekuhlaleni zika-2019! Nibuye niphila naku-2019 nto zakuthi!