Uhambe eseyintshatsheli uGabula ‘Tiger’ Vabaza!
UBEKWA kwikhaya lakhe lokugqibela owayesakuba yintshatsheli yehlabathi, uGabula Vabaza. Le ndedeba isweleke ngomhla weshumi elinesibini kule nyanga emva kokugula ithutyana.
Inkonzo yakhe yokugqibela izakubanjelwa eCity Hall, eMonti, ngoLwesihlanu ngentsimbi yeshumi kusasa.
Umlandeli kaGabula waseZiphunzane, uSakhumzi Tyalithi, uthi baxhelekile emphefumlweni emva kwesi sehlo.
“Sixhelekile emphefumlweni singabalandeli bamanqindi. UTiger wayeyimbethi-manqindi eyahlukileyo. Besimthanda kakhulu singabalandeli bakhe,” uTyalithi utshilo.
UVabaza zange wabethwa kwimilo engamashumi amabini anethoba. Waqala ukulwa kudidi oluphezulu ukusuka ngonyaka ka-1996 uyokuthi xhaxhe ku-2006. Uphumelele intshinga yoMzantsi Afrika kudidi lwempukane nakwele Junior Bantamweight.
Waphumelela iintshinga zehlabathi: IBO, WBU neWBA International. Kwezinye iindaba zamanqindi: Abuyela kuGatyana amanqindi kule mpelaveki.
Umququzeli wetumente uMnu. Ntsika Sigcawu, we-Isizwe Promotions, uthi bazimisele ukukhulisa amanqindi ezilalini. “Sizimisele ukukhulisa amanqindi ezilalini. Kuza kubamnandi kule tumente ngoba wonke umntu uzakube egodukile,” utshilo uSigcawu.
Oka Sigcawu uthi enye yeenjongo zabo kukukhulisa umdlalo wamantombi. “UMzantsi Afrika lilizwe likamakulinganwe. Amanenekazi nawo ayakwazi ukudlala amanqindi. Sifuna ukuncedisa ekukhuliseni amanqindi wamanenekazi,” utshilo uSigcawu.
Umlo ophambili uphakathi kwentshatsheli yeWBF kwihlabathi - uBukiwe Nonina waseDutywa noBabalwa Nonqonqotho waseZiphunzane.
UPhumlani Maloni uza kuphinda aphekuzane noLoyiso Ngantweni. UNwabisile Cholani uza kuvana amandla noThandolwethu Hlangani.
UZama Zokwe uza kungombana noSimphiwe Ntshangana, uSolwethu Sithupha uza kuxhimfana noPhumelela Mayi. Itumente iqala ngentsimbi yokuqala, eWillowvale Indoor Sports Centre, ngeCawe.