UMasutha akamoyiki uMpengesi!
INDODA ephethe iChippa United, uSiviwe Mpengesi, udume kakubi ebholeni yaseMzantsi Afrika ngokugxotha abaqeqeshi – kodwa uJoel Masutha ubonakala ngathi ayimxhalabisi nakancinci lo nto.
UMasutha ufike kwiiveki ezimbini ezidlulileyo emva kokugxothwa kuka-Eric Tinkler.
Phambi kukaTinkler kwakukho uDan Malesela owagxothwa emva kwemidlalo emithathu qha.
“Ndakuba ngumntu onovalo mhla ndayiyeka ibhola okanye xa ndinelam iqela. Ndazixelela okokuba ndiza kumgxotha phambi kokuba andigxothe. Kodwa soze ube ngumqeqeshi ukuba uligwala. Ukugxothwa yinto engaphaya kwamandla wethu baqeqeshi,” utsho uMasutha.
Ngomso, iChippa idibana neBidvest Wits emdlalweni wePSL oza kubanzima eBidvest Stadium ebusuku. Omabini amaqela azingela amanqaku phambi kokusongwa konyaka.