Amagqala aqeqeshe abadlali abaselula eCala
EKUQALENI kwale nyanga, inkampani yamafutha, uEngen, wenze into abangasoze bayilibale abadlali bebhola ekhatywayo eCala.
Abantwana bezikolo ezahlukeneyo babuthelene eCala Secondary School – apho bafumene khona uqeqesho kumagqala ebhola ekhatywayo afana noThabo September, uMark Fish noJabu Mahlangu.
Uneminyaka eliqela uEngen kwicala lokuphuhlisa ibhola ekhatywayo. Zibalelwa kwisixhenxe izikolo ezikhe abantwana abaphakathi kweminyaka elishumi elinesine neshumi elinesixhenxe.
Abadlali bakuthakazelele ubukho bamagqala kwaye inconyiwe indlela abathe bazimisela ngayo emidlalweni yocweyo ebiphantsi kweliso elibukhali leengcali.
UGcinikhaya Siswana uyincomile kakhulu into eyenziwe nguEngen watsho ebalula nokubaluleka kwenkxaso abantwana abayidingayo ebazalini.
“Mna ndisuka eNgcobo. Injongo yethu kukuphuhlisa izakhono zabantwana apha ezikolweni. Abantwana bayonwabele le nto. Ukuba ootitshala bangaqina, mhlawumbi bakhona abadlali esinokubabukela kumabonakude. Bayadlala abantwana – kodwa ke ingase bafumane inkxaso ebazalini babo. Siyayivuyela into eyenziwe nguEngen ngoba siqhele ukuyibona kwiidolophu ezinkulu le nto,” utshilo uSiswana ongumqeqeshi wabadlali abaselula.
“Namhlanje uEngen uthathe ibhola ekhatywayo wayizisa ezilalini. Ziliqela izinto esizifundise abadlali ezinokuthi zibancede njengabadlali bebhola ekhatywayo ngaphakathi nangaphandle kwebala. Basibonisile ukuba bazimisele ukufunda emidlalweni. Iindawo ezinje zingavelisa abadlali abaphezulu. Noxa iliphondo elingahoywayo kodwa livelise abadlali abaphezulu kwibhola ekhatywayo,” utshilo uMark Fish.
“Silapha namhlanje ezilalini ngoba abantwana balapha bayayazi ibhola. Injongo yethu kukubafundisa ezona zinto zibalulekileyo ebholeni njengokubamba ibhola ngonyawo, ukwanikela nokwazi izinto ekufanele uzenze xa usebaleni ungumdlali. Izinto ezinje zidla ngokuthatha usuku olunye.
Le into zange yenzeka, ithatha iintsuku ezine ngoba sifuna bafunde.
Ekugqibeleni abanye babo bangathathwa yiSuperSport United,” utshilo uPule Mahlangu.