UMcCarthy ufuna ukuvala unyaka ngesitayile
IQELA lebhola ekhatywayo eliphambili eNtshona Koloni, iCape Town City, lifuna ukuvala unyaka ngesitayile. Oku kuthethwe ngumqeqeshi walo, uBenni McCarthy, xeshikweni ethetha neentatheli emsithweni ekwamkelwe kuwo umdlali omtsha uKermit Eramus.
Amakhwenkwe kaMcCarthy akakwazanga ukufumana amanqaku apheleleyo ekhaya edlala neChippa United kwiveki ephelileyo.
Umdlalo uphele ebambene amaqela ngegowuli elinye macala nangona iCitizens ibilelona linamandla namathuba okuphumelela umdlalo.
NgoMgqibelo, iCity yamkela iBloemfontein Celtic emdlalweni wePSL ekulindeleke utshise ngo’18:00. UMcCarthy uya emdlalweni ozayo encwase amanqaku amathathu ukuze iqela livale unyaka lisendaweni entle.
“Zininzi kakhulu izinto esizenze kakuhle ngethuba sidlala neChippa. Sikwazile ukufaka igowuli kwangoko emdlalweni – kodwa asakwazi ukufaka elinye kwakhona. Akukho nto endiyikhalazelayo ngomdlalo weqela lam. Ndisithandile isicwangciso sethu nangona izinto zingahambi kakuhle. Mhlawumbi kungenxa yeAthlone Stadium. Siza kudlala neCeltic phaya eCape Town Stadium – indawo ephangaleleyo. Ndiyathemba abadlali bethu ngeke baphazanyiswe yiholide. Ndifuna iqela lidlale kakuhle ukuze livale unyaka ngesitayile,” utshilo uMcCarthy.
UBenni wamkele ifolosi entsha emva kokuba uTokelo Rantie, otyikitywa ekuqaleni kwesini, engakwazanga ukulinceda iqela laseKapa.
UKermit Erasmus unethemba lokuvuselela ikhono lakhe lokudlala ibhola. Emva kokushiya i-Orlando Pirates eminyakeni emithathu edlulileyo, uKermit udlalele amaqela aseYurophu aquka iStatde Rennais, iAthletic Eskilstuba neVitoria Setubal.
“Ndiyakuvuyela ukubalapha. Ingathi awufiki unyaka omtsha. Ndihleli ixesha elide kwaye ndicinga ukuba iKapa yindawo endilungeleyo. Akukho nto engako endingayithetha ngomqeqeshi, uyayazi indlela endiziva ngayo,” utshilo uKermit.
Yindoda eyaziwayo uKermit ngokufaka amagowuli emidlalweni kwaye wazenzela igama nakwiqela lesizwe.