Bade bahlawuleka abancedisi ezikolweni
EMVA kwamagingxigingxi okungahlawulwa kwabo, bekhala, abaqeshwa njengabancedisi ezikolweni kwinkqubo yesebe lezemfundo eqale ngexesha likabhubhane wecovid-19, bade babe bayahlawulwa emva kokuba umphathiswa wezemali ephondweni umlungisi Mvoko, kuhlahlo lwabiwomali alwenze kwiveki ephelileyo ethe wabela isebe lezemfundo imali eyir38.559 yeebhiliyoni, ekubeni isombulule iingxaki eli sebe elijongene nazo kwanokuphucula iinkonzo zeli sebe.
Uninzi lwaba bancedisi, ingakumbi abaseamatole East, nabaqale kuoktobha abanye ngonovemba kunyaka ophelileyo, kudala lwakhala, likhalela I’solezwe lesixhosa ngelithi iinyanga ziyaqengqeleka bengahlawulwa kambe abanye bexhomekeke kule mali yesibonelelo basifumana kweli sebe.
Abathe bancokolela eli phephandaba bathi barholile ngomvulo kule veki, berholela iinyanga ezimbini ujanuary kwakunye nofebruary, ngoku ixhala kukuba ingaba baza kuyifumana na apha kule nyanga kamatshi xa begqiba.
“Andifun’ ukuxoka isiswantsulisile le meko kuba besiboleka iimali zokukhwela nezokuhlawula apho sihla khona kuba simane sithenjiswa ukuba iza kungena ingaze ingene. Ngoku eninzi sibhatale amatyala esiwenzileyo, kodwa ke akufani kuba side sabe siyarhola," utshilo omnye waba bancedisi ocele ukungavezwa.
Omnye okwisikolo esiphantsi kweelali zakugatyana uthe, kunzima ingakumbi kubo bona bengabafana kuba banoxanduva emva emakhaya.
"Nam ndiyavuya sithe sabe siyancedakala, bekungekho lula kuba xa uqashwa nokuba into incinci uba nezicwangciso obanazo onqwenela ukuzifezekisa."
Abanye badize ukuba imali ibifika, ifikele kwinqununu yesikolo, kwaye inqununu ithi yimali yokutya kwabantwana esikolweni ayoyabo abancedisi. Uthi ibisoloko isithi inqununu nayo isalinde isebe.
Abancedisi abakwesinye sezikolo eziphantsi kwedolophu yasengqamakhwe bathi kube nzima kakhulu kubo bekufuneka kuliwe xa kufike iintsuku zokurhola kwabo. Bathi kudisemba imali bayifumene sekungemnandanga, bancedwa kukubhatalwa sisikolo kweyesikolo imali.