Igalelekile ingxikela yetumente yebhola emthatha
KWENZIWA amatiletile okuqinisa inkqubo yophuhliso lwebhola ekhatywayo emthatha. Ekuseni ngentsimbi yesibhozo, oompondozihlanjiwe bamaqela ebhola baza kuvana amandla kwitumente yeentshatsheli ebizwa ngokuba yibig 8 Sport Tournament kwibala lasewalter Sisulu University.
Eli velatanci letumente lihlanganyelwe ziinkampani ezine. Abalawuli bazo banenjongo yokubangula italente elutsheni lweedolophu ezifana nengqeleni, umthatha, umqanduli nasengcobo.
Imidlalo ayiphelelanga ebholeni ekhatywayo kuphela, namanenekazi akube ekhuphisana emidlalweni yomnyazi kwelinye icala.
Iintshatsheli eziphume kwiitumente ezine, zizo eziza kudibana ewalter Sisulu Stadium ngentseni yangomgqibelo. Abaququzeleli bacele amaqela aye namaqela omeleleyo emidlalweni yebig 8 Sport Tournament ngoba nangona isisiqendu sokuqala setumente, kodwa bazimisele ukuza nento enkulu ngakumbi kunyaka ozayo. “Sigqibe kwelokuba kubekho itumente enkulu apha empuma Koloni. Makungadlalwa nje phaya ezilalini kuphelele apho.
Kukho italente, amaqela aphezulu akayi kweziya iindawo, kube kukho iintwana eziyidlalayo neziyithandayo ibhola. Sithe masidibanise iintshatsheli ndawonye ukuze zikhuphisane phambi kwabacholacholi betalente esibamemileyo,” utshilo umququzeleli webig 8 Sport Tournament.
Amaqela avumelekile ukuchonga abadlali abasemgangathweni ophezulu nakwamanye amaqela kwiindawo akuzo.
“Kuba sisayisungula, sithe masingayenzi ibe nkulu. Kuza kudlalwa ibhola ekhatywayo neyomnyazi. Silindele iindwendwe ezisuka kwimamelodi Sundowns, kwits Galaxy nakwicape Town City,” utshilo umququzeleli.
Amaqela aphumeleleyo aza kugoduka encumile kakhulu. Iintshatsheli ziza kufumana ir20 000 nendebe ekhatshwa ziimbasa. Elibambe indawo yesibini liza kufumana ir10 000. Kanti ngaphezulu koko aza kuphiwa izikipa zokudlala.