'Andizithandi izindlu zethutyana'
UMPHATHISWA wokuhlaliswa koluntu kweli Phondo unonceba Kontsiwe uthi into yokunika umntu indlu yethutyana yinkcithamali. Ukontsiwe uthi ukuba bekuya ngokwakhe abantu ngebesakhelwa izindlu kube kanye, hayi ezethutyana.
Ukontsiwe ebethetha noluntu emonti, ngethuba eli sebe libambe indibano lixoxa noluntu ngeenjongo zokuva ukuba ingaba lona lubona njani na ngokuza kuthi kwenziwe leli sebe kunyakamali ka2022/23.
Eli sebe belifuna ukuva iimbono kwanezimvo zoluntu ngeli sebe liza kutsho likwazi ukuphucula kwanokulungisa apho ligxekwa khona, ngokokutsho komphathsiwa.
Uthi izindlu zethutyana nezaziwa njengamabhangala zenzelwe abo bakwintlekele okanye onengxaki ngelo xeshana, kwaye zibiza kakhulu ngokwemali engade ilingane nale yendlu esi sigxina.
“Ezi zindlu zethutyana into ebangela ndingazithandi kukuba zezexeshana kwaye kum kungathi aziniki esa sidima kwixhoba. Okwesibini ziyaxabisa kuba zixabisa into enganger64 000, ibe ngokomgaqonkqubo kufuneka emva kweenyanga ezintandathu zichithwe nomxhamli wendlu abe sele efumana indlu yakhe eyakhiweyo. Ukuba bekuthwa ndikwindawo yokutshintsha lo mgaqonkqubo bendinokuthi ndize nesisombululo esisigxina hayi isisombululo sethutyana,” utshilo ukontsiwe.
Uthi nangona nje zisekezelwe ekubeni umntu ahlale ixesha elincinci elingagqithanga kwiinyanga ezintandathu, kodwa uyakufumanisa ukuba omnye uneminyaka ehlala kweli bhangala.
Uthi ziliqela nje izinto ezimenza ukuba angazithandi ezi zindlu zethutyana, ikwakukuthoba isidima somntu lo umnika eli bhangala phofu ube usithi uphucula ubom bakhe.
Uthi ngaphandle kokuba umntu ngenene usengxakini, akukho nomakhelwane onokuthi amthathe, kulapho kuye kunganyanzeleka anikwe indlu yethutyana.
Umphathiswa ukwabongoze oomasipala, iinkosi ingakumbi ooceba ekubeni bancedisane nabo beli sebe kwiingxaki ezisekuhlaleni nasemakhaya. Ukwawuchaphazele nomba weetayitile. Ukanti ukwatyityimbisele umnwe abo babhalisa izindlu bathi bakuzifumana baphinde bazithengise.
Usekela Mphathiswa kuzwelonke, upam Tshwete, ukhalimele umba wokuthathwa kwexesha elide lisebe xa kuthe kwakho intlekele. Uthi isisombululo masikhawuleze kwangoko kumaxhoba. Uthi oomasipala bathatha ixesha besithi basaqokelela ulwazi lwamaxhoba, abe phofu amaxhoba egodola phandle. Uthi kube kusithiwa kusalindwe ulwazi olusaqokelelwayo, lo nto ifane nokuba ayiseyontlekele.
Utshwete naye uzeke mzekweni esithi abahambisani nabantu abafumana izindlu zikarhulumente bazithengise bakugqiba baphinde babuyele ematyotyombeni babhalise kwakhona.