Umandisi uyolisa ngocwambu lwengoma nengqiqo
IKHUTHAZWA luthando lomculo wezitibili impumelelo yemvumi umandisi Dyantyis isekelwe ekubeni ethanda ukusebenzisana nezinye iimvumi. Ubungqina boko kubonakala mhlophe kwicwecwe lakhe lesibini elithi : Cwaka.
Eyona nyaniso namhlanje kwiqonga lomculo kukuba nayiphina ikonsathi umandisi Dyantyis athi ayibhengeze, amatikiti ayo athengwa oku kwamagwinya ngexeshana elingephi.
Icwecwe lakhe lesibini ucwaka alikhuphe kweyomnga ka 2021 lamkelwe ngomdla ngabathandi bomculo ntoleyo ebonakalisa ubunganga bakhe sukela oko waqala ukukhokela iqela leemvumi ngoowe 2018 nalapho wakhupha icwecwe lokuqala elithi Somandla.
Udyantyis ngoku ungundabamlonyeni ngendlela awenza ngayo umculo wakhe edibanisa ubuchule bokuvuthela ixilongo, ukunonga iingoma aziqambayo. Uyayiphila ingoma.
Ukuze umqonde kakuhle kumele uqwalasele imvelaphi yakhe ujonge iimeko nabantu ababanefuthe ekukhuliseni le mvumi. Yinzalelwane yasenew Brighton, egqeberha ndawo leyo ingumthombo womculo womngqungqo nekwalikhaya lezigantsontso ze-jazz ezifana noofeya Faku, ongasekhoyo uzim Ngqawana namanye amagqala amaninzi. Kunjalo le lokishi iyadeleleka xa kuthethwa ngembali yomculo wezitibili nekwayala.
“Ezona kwayala zakhe zankulu emzantsi ziphuma enew Brighton,” utsho udyantyis. Ugqala imighty Matthews Singers nejoy of Africa Choir njengezo zingumzekelo kwaye zingoovulindlela abakumgangatho ophezulu.
“Nawe unokuyiqonda inokuba zazininzi iikwayala ezavuswa ngabantu ababekhuthazwa zezingxilimbela zeekwayala.
Umgangatho wawuxhonywe ukwelinye nje inqanaba,” udyantyis uhambisa atsho evakalisa ifuthe ezikwayala ezaba nalo ekukhuleni kwakhe.
Uthi ukukhulela kwimeko enje kwanceda ulutsha oluninzi kuba wonke ubani wayefuna ukuba yinxalenye yeekwayala.
“Sasizingca ngokuba yinxalenye yeekwayala, sasiziva sohlukile, sasineminyakana nje ephakathi ko-11 no-10 kodwa sasinqwenela intlonipho eyayinikwa amalungu ezi kwayala,” utsho.
Isithethe sekwayala njengoko udyantyis ecacica sibethelela intsebenziswano kumalungu ayo onke. Ukuze ubelilungu kumele uzibophelele kwingcamango yokuba nangona ucula wedwa nicula njengeqela elinye ntoleyo ihlwayela umanyano.
Udyantyis ubona ukwehla komgangatho womculo weekwayala ezinkonzweni into acinga ukuba yenziwa yinto kukunqulwa kawabahlabeleli okanye iimvumi ezicula iingoma zazo zize ziphelekwe liqaqobana leemvumi.
“Iikwayala azisafani nakudala, awusekho lamoya wobunye. Ingulowo wenza ukuthanda kwakhe,” utsho
Efika ekapa ngowe-2002 eyokufunda e-university of Cape Town (UCT) wangena kwinkonzo yamawisile erosebank nalapho wazibandakanya namalungu baze bavusa ikwayala.
“Ekuqaleni ndandisiya enkonzweni ngeecawe, ndihlale nje emva. Kwekhu, ndandibulawa yingoma, kwakuculwa kakubi apho. Yaqhubeka lento yanga uthixo uthi kum ”Uyakukrikritheka de uphakame ucule ngokwakho“Mna nadifuna ukuba ngumkhonzi kodwa ke ubizo lomculo lwandikhwelezela,” utsho.
Nanjengoko sibonile kwiminatha yonxibelelwano , ngenene uthixo wathetha kwavakala.kukho ividiyo ekuyoutube ka Dyantyis ekhokela ikwayala yecape of Good Hope
District becula usiyakudmisa Thixo. Le vidiyo ibonisa imvakelelo enzulu anayo ngomculo, isakhono esingako!
Emva kokuphuma kwakhe EUCT udyantyis uzibandakanye ne -Isango Ensemble, inkampani yethiyetha ekapa.
Apha wenza umsebenzi oncomekayo nawuthandayo. “Nangona kukho abalawuli bomculo abadlala izixhobo ezithile , owam umsebenzi kukubanika indlebe ndimamelisise. Konke oku kundinika ithuba lokuba sisicaka sabo esilungele ukulungisa nantoni efuna oko,” utshilo udyantyis.
Uthi ixesha alichithe e-isango Ensemble lilo elimbumbe njengemvumi ayiyo kungoku nje . Uye wanegalelo ekuguquleni ithe Magic Flute - Impempe Yomlingo kamozart. Ubenendima ayidlalayo kuvenus and Adonis, umdlalo weqonga owavula ishakespeare’s Globe Theatre elondon ngo-2013. Ngo -2017, udyantyis uqambe umculo omtsha owabandakanya amagwijo emfazwe yehlabathi yokuqala ayeza kusetyenziswa kwibali lokuzika kukamendi elisekelwe kwincwadi ebhalwe ngufred Khumalo ethi Dancing the Death Drill.