Isinika ithuba lokuzibonakalisa inedbank Cup
UKHUPHISWANO olwaziwa njengenedbank Cup lufikelela kwesona sigaba esibalulekileyo ngempelaveki. Asibhozo amaqela ashiyekileyo. Iqela ngalinye liya emdlalweni lifuna ukuzibekela indawo kumjikelo olandelayo wenedbank Cup enamaqithiqithi amahle.
Phakathi kwaloo maqela asibhozo kukho iqela lakwazulunatal ekuthiwa yisummerfield Dynamos esuka kwiabc Motsepe League.
Lilo lodwa iqela elishiyekileyo elidlala kwimotsepe League.
Wonke umntu wothukile ngumgama ewuhambileyo kwinedbank Cup ebiqalwe ngamaqela angaphaya kwamashumi amathathu.
Kodwa nangona kunjalo, akothusi ncam kwabo bamaziyo uclinton Larsen ongumqeqeshi wayo idynamos. Sele ihlabele mgama nakumalungiselelo okuya kwigladafrica Championship, ngoku ifuna ukuzibonakalisa kwinedbank Cup.
Oku kuza kucaca xa idynamos ihlangana noomanqanqa bebhola, imamelodi Sundowns, emdlalweni wenedbank Cup oza kube ungo18:00 ngomgqibelo, eloftus Stadium. Lo mdlalo ufaniswe nomlo kadavide nogoliyathi ngokalarsen.
Emva kokuba isundowns ibethe imathaithai FC ngo6-0, kulindeleke iphinde ihambe lula kwidynamos, kodwa ularsen uthi iqela lakhe lingawothusa umzi.
“Eli lithuba lokuba abadlali bazibonakalise emlweni esingawufanisa nokadavide nogoliyathi,” utshilo ularsen emva kokuthelekiswa kwamaqela.
“Akekho umntu obecinga ukuba singakwindawo esikuyo ngoku. Siza kuqhubela phambili nokusebenzela ukuzalisekiswa kwephupha lethu. Wonke umntu uyayazi ngoku idynamos. Lo nto indenza ndizingombe isifuba,” utshilo ularsen owaziwayo ebholeni ekhatywayo emva kokuqeqesha amaqela afana nechippa United, ipolokwane City, ibloemfontein Celtic, igolden Arrows namanye.
Ijongene nomsebenzi onzima kakhulu idynamos ngoba isundowns izimisele ukuthatha zonke iindebe ezikhoyo kwipremier Soccer League.
Amasandawana sele eyiphumelele IMTN8 Cup, ngoku afuna indebe yenedbank neyedstv Premiership logama ezama ukuphumelela NECAF Champions League.
Imidlalo yenedbank Cup: Lwesihlanu: Tshakhuma FC vs Supersport United @Thohoyandou Stadium, 19:00
Mgqibelo: Marumo Gallants vs Baroka FC @Peter Mokaba Stadium, 15:00; Mamelodi Sundowns vs Summerfield @Loftus Stadium, 18:00
Cawa: Royal AM vs University of Pretoria @Chatsworth, 15:00