Zibaliwe iintsuku zikambule osikiweyo
UBUDLELWANE phakathi kukasipho Mbule neqela lakhe, isupersport United, bujike bakrakra okwencindi yekhala kwiveki ephelileyo. Oku kulandela isigqibo sokumnqumamisa umbule emva kweengxelo ezithi ebekhe akabonakala enkampini yesupersport United isithuba esingangeveki.
Ukunqunyanyiswa kukambule kubhengezwe yingqonyela yesupersport, ustan Matthews. Ingxelo ithi umdlali wenziwe ikheswa ngenxa yezizathu zokungaziphathi kakuhle.
“Usipho kuthiwe makathi xha ngokuza ejimini ngenxa yokungabahloniphi abaqeqeshi nabanye abadlali,” utshilo umatthews kumajelo eendaba.
Umqeqeshi wesupersport, ukaitano Tembo, khange afune ukuthetha ngombule ebuzwa ngokungabonakali kwakhe emidlalweni mva nje.
“Andifuni ukuthetha ngosipho Mbule. Leyo yinto efanele abaphathi beqela,” utshilo utembo ophantsi koxinizelelo kwiqela lasepitoli. Ukusukela oko wathi wadlalela Amatsatsantsa, uyaqala ukungabonakali umbule emidlalweni.
Kwiinyanga ezidlulileyo, umbule ebesoyanyaniswa nokuya kwimamelodi Sundowns nekaizer Chiefs. Oogxa bakhe ababini baye bathathwa yisundowns. Yena washiyeka ngasemva. Ziqale ngoko iingxaki zikambule okubonakala ngathi wohlwayelwe ukugqushalazela ukuhamba ekuqaleni kwalo nyaka. Amakhosi aye avuma kutshanje ukuba ebemfuna umbule kodwa umatthews walile ukuwathengisela.
Impixano kambule nabaphathi bakhe yenzeke ngexesha elibi kakhulu isupersport United ingaqhubi kakuhle konke konke ebaleni.
Kukhangeleka ngathi umbule ngeke aphinde ayidlalele isupersport United kule sizini.
Nangona Amatsatsantsa engasandisa isivumelwano sakhe sengqesho xa efuna, okwenzekayo ngoku kubonakalisa mhlophe ukuba umbule akasazimiselanga ukuhlala epitoli.
Ayiphathekanga kakuhle isupersport United ngoba ibinethemba lokwenza imali ngomdlali ofana nombule njengoteboho Mokoena okuthiwa uthengwe ngesityhwentywe yisundowns.
Akukacaci kodwa ukuba leliphi iqela aza kuya kulo xa kuphela isivumelwano sakhe kwisupersport kwinyanga yesilimela kulo nyaka.