Iphulo i-operation Vulindlela livula indlela yokukhula koqoqosho
UQOQOSHO lomzantsi Afrika, njengalo naluphi na olunye uqoqosho, alunakusebenza, singasathethi ke ngokukhula, ngaphandle koshishino olusebenzayo kunye nolukhuphisanayo.
La mashishini - aquka umbane, amanzi, ezothutho kunye nawonxibelelwano - ayimithambo yokuphila koqoqosho.
Iingxaki zokwakheka kwezi ndawo kudala zichazwa njengezinye zezona zithintela uhlumo loqoqosho lomzantsi Afrika. Ukungasebenzi kakuhle kunye neendleko eziphezulu zeenkonzo zothungelwano kungumqobo ekwenzeni ishishini kweli lizwe.
Ukujongana kunye nokoyisa le mingeni, siye saseka -Operation Vulindlela kweyedwarha yowama2020 njengenyathelo le-ofisi kamongameli kunye onondyebo wesizwe ukukhawulezisa ukwenziwa ngokutsha kwezakhiwo kula mashishini uthungelwano.
Ngelixa amasebe karhulumente kunye namaqumrhu anoxanduva eqhuba oluhlaziyo, i-operation Vulindlela ibeke esweni kwaye yachonga imingeni kunye nemiqobo. Apho kuyimfuneko, iye iququzelele amasebe inkxaso yobugcisa.
Ingxelo yekota yakutsha nje ichaza umgama osele uhanjiwe i-operation Vulindlela kunye namasebe anoxanduva loku kwenziwa ngokutsha.
Kurhulumente wonke, sigxile ekwenzeni ngokutsha okusisiseko kunye nokuguqulayo; nokuvelisa ngokutsha indlela esebenza ngayo uqoqosho lwethu.
Oku kuquka intengiso yamaza omoya emfonomfono zonxibelelwano
ezishukumayo nafunwa kakhulu, eyalibaziseka ngaphezu kweminyaka
elishumi yaza ekugqibeleni yagqitywa kweyokwindla.
Ukukhutshwa kwamaza omoya amatsha kuya kuphucula uqhagamshelwano kwaye luhlise iindleko zedatha. Ukusekwa kogunyaziwe wamazibuko esizwe
njengecandelo elizimeleyo le-transnet kulo nyaka uphelileyo, kulibaziseke
ngaphezu kweminyaka eli-15. Eli yaba linyathelo eliyimfuneko ekuvumeleni
icandelo labucala ukuba lithathe inxaxheba kunye nasekwandiseni ukusebenza
kakuhle kweetheminali zethu zamazibuko.
Siphinde sabuyisela inkqubo ye-blue Drop i-green Drop kunye ne-nodrop okokuqala ngqa ukusukela ngonyaka wama-2014 ukuqinisekisa ukubekwa esweni okubhetele komgangatho wokucocwa kwamanzi kunye namanzi amdaka.
Sipapashe uluhlu lwezakhono ezibalulekileyo, nokokuqala ngqa ukusukela ngo-2014. Le yeminye yemizekelo apho olu lawulo lukwazile ukuqhuba inkqubela,
ngokuthi lujolise umzamo kunye nengqalelo kwinani elicuthiweyo lokwenza
ngokutsha kwezinto eziphambili. Ngokusebenzisa i-operation Vulindlela, sikwazile
nokuthatha indlela ejolise ngqo kunye nebandakanya zonke iinkalo zokwenza
ngokutsha, siqinisekisa ulungelelwaniso olungcono oluquka amasebe amaninzi
kunye namaqumrhu karhulumente.
Owona mzekelo ubalaseleyo woku ukwicandelo lezamandla, apho uninzi
lokwenza ngokutsha olubalulekileyo nolunxibeleleneyo luqhuba khona
ukuze kutshintshwe indlela esivelisa kunye nesiwusebenzisa ngayo umbane.
Amanqaku abalulekileyo aquka ukunyuswa kobume belayisenisi yeeprojekthi
zokuvelisa ngokutsha ukuya kutsho kwi-100mw, oku kuvumela ezi projekthi
ukuba ziqhagamshelane kwaye zithengisele abathengi umbane. Siyivuselele
inkqubo yokufumana umvelisi wamandla ombane ovuselelekayo ngokuvula izikroba ezintsha zokunika amaxabiso.
Utshintsho kwimimiselo yomthamo wokuvelisa ngokutsha kuvumele oomasipala ukuba bathenge umbane ngokuzimeleyo okokuqala ngqa. Kwaye uhlaziyo lwemithetho ekugqibeleni luya kuzala imarike entsha ekhuphisanayo yombane, exhaswa kukupapashwa komthethosihlomelo oyilwayo wolawulo lombane kunye nomsebenzi oqhubekayo wokuhlomela umgaqonkqubo wamaxabiso ombane.
Inkqubo yokohlula-hlula u-eskom isendleleni, yaye eli qumrhu lihlangabezana
nomhla walo wokugqibela owabekwa ngenyanga yomnga wama-2021 wokusekwa kwenkampani yesizwe yothumelolombane. Ngeyomnga kulo nyaka sinethemba
lokugqiba ukohlulwahlulwa kwecandelo lokuvelisa kunye nokusasaza kombane lika-eskom. Ingxelo yekota iqaqambisa ezinye izinto ezibalulekileyo eziphunyeziweyo, kwakunye nemimandla apho umsebenzi onzima uqhubeka khona. Kwicandelo lamanzi, i-operation Vulindlela inikezela ngenkxaso yobuchwephesha kwisebe
lezamanzi nogutyulo ukuze liphumeze isicwangciso sotshintsho ekunikezelweni
kweelayisenisi zokusebenzisa amanzi, lijolise ekujongeni malunga nama80% zazo zonke izicelo zingaphelanga iintsuku ezingama-90.
Usaqhubeka umsebenzi wokuseka i-arhente yesizwe yeziseko Zophuhliso lwemithombo yamanzi eza kuqinisekisa ulawulo olungcono lwemithombo yamanzi esizwe sethu.
Kwicandelo lezothutho, ukungasebenzi kakuhle kwamazibuko kunye
noololiwe kukuchaphazele kakhulu ukuthumela kwethu impahla kumazwe angaphandle. Uyaqhubeka umsebenzi wokuseka intsebenziswano nabasebenzi becandelo labucala ukuze batyale imali kwiziseko zophuhliso lamazibuko
kunye nokuphucula ulawulo lweetheminali zeekhonteyina kumazibuko
asethekwini kunye nawasengqura. Iphepha lengcacisonkqubo lomgaqonkqubo
wesizwe kaloliwe, elavunywa yikhabhinethi kweyokwindla, lichaza izicwangciso zokuvuselela amaziko kaloliwe kunye nokwenza ukuba abantu bafikelele kuthungelwano loololiwe bokuthutha. I-transnet Freight Rail sele iqalisile nenkqubo
yokwenza imizila ifumaneke kubasebenzi bakaloliwe babucala bothungelwano.
Inkqubo ye-e-visa esebenza ngokupheleleyo iye yaqaliswa kumazwe ali14, kubandakanywa nezinye zezona marike zethu zinkulu zabakhenkethi.
Uphononongo olubanzi lwenkqubo ye-visa yomsebenzi nayo iyaqhuba ukuze
sikwazi ukutsala izakhono ezifunwa luqoqosho lwethu.
Oku kwenziwa ngokutsha kwenzekile ngenxa yentsebenziswano engcono
koorhulumente bebonke, bexhasa i-ajenda yohlaziyo ekwabelwane ngayo.
Sihlaba ikhwelo koosomashishini kunye nabatyali-mali ukuba bathathe ithuba kolu tshintsho luqhubekayo kwaye bajike izibhambathiso kunye nezibophelelo zabo zibe lutyalomali olubonakalayo.