Uchueu nomqeqeshi wemarumo Gallants banyathelene!
AYIKAPHUMELELI namnye umdlalo imarumo Gallants kuleyo mithandathu eyidlalileyo, kodwa ingxaki enkulu ejongene nabaphathi yeyabaqeqeshi.
Uromain Folz uchazwe njengobeke phantsi iintambo ngempelaveki ngomhla womdlalo wedstv Premiership obuphakathi kwegallants neswallows.
Isizathu esabangela apheqe umqeqeshi uthi kukuxelelwa ukuba makafake abadlali abathile ebaleni ngomhla womdlalo.
Noxa engazange ankqangaze mntu ngegama, kodwa ekuqaleni kweveki kuye kwacaca ukuba oyena mntu anyathelene naye ezinzwaneni nguharris Chueu – umphathi oyintloko wabaqeqeshi.
Emdlalweni ogqithileyo khange abekho ufolz ngenxa yaloo mbambano.
Emva kokuba igallants ibambene neswallows ngenqaku elinye macala emdlalweni obuselimpopo, uabram Sello wathi khange ayive eyokulahla komqeqeshi wakhe, kodwa wathembisa ngokuyisabela.
Uchueu uzikhanyele izityholo, watsho ephindisa ngelithi ngumqeqeshi oyena mntu ongafuni ukuva into esuka komnye umntu.
Ekuseni ngolwesibini, imarumo Gallants ikhuphe ingxelo ebhaliweyo ezibhekelisayo kwiintetha ezenziwe nguchueu obonakalayo ukuba ukuchasile ukuqeshwa komqeqeshi wasefrance.
“Sifuna ukwazisa abantu ukuba imarumo
Gallants ayidibenanga nezinto ezithethwe ngumlawuli weqela, uharris Chueu.
Usihlalo weqela uyabaqinisekisa abalandeli ukuba uyathetha nabo bonke abachaphazelekayo ngenjongo yokufumana isisombululo,” itshilo igallants.
Ngenxa yobudikidiki besiqalo segallants kule sizini entsha, lungakhona uxinizelelo ukuba ayikwazi ukuphumelela imidlalo kwelandelayo.
Kulindeleke ukuba ilwele ukuphumelela umdlalo wayo wokuqala imarumo Gallants xa isamkela ikaizer Chiefs emdlalweni wedstv Premiership ekulindeleke ukuba utake iintlantsi eroyal Bafokeng Stadium emalanga ngecawe.
Akukacaci nokuba uya kube esekhona na umqeqeshi.
Amakhosi aza kuzama ukuntywilisela imarumo emva kokubambana namazulu emdlalweni obunzima EFNB Stadium kwiveki ephelileyo.