Usesona uzithaphulele iimbasa egqeberha
IKAMVA lentombazana egama lingusesona Tshume liqaqambile emdlalweni wemithambo (Gymnastics).
Oku kucace gca ngethuba usesona, 14, ebuya neembasa ezintathu, eyegolide nezesilivere kwitumente yephondo lempuma Koloni ebibanjelwe egqeberha ekuqaleni kwale nyanga yomsintsi.
Usesona, ozenzela igama kwicandelo lemithambo, yintombi kazukiswa Tshume ongumdidiyeli weendaba ESABC kwiphondo lempuma Koloni.
Ngethuba uninzi lwabantu lwalukhonkxwe ezindlini yikhorona kwiminyaka emibini edlulileyo, usesona wayezilolonga engenalo iqela. Kuba wayeyifuna le nto ayenzayo ngoku, wazifundisa ejonga iividiyo ezikuyoutube.
Walifumana iqela akulo ngoku, Ibhayi Rhythmic Gymnastics Club, emva kokuthi tshitshilili kwemifanekiso yakhe kumakhasi onxibelelwano esenza into adume ngayo.
Njengokuba kwitumente yemithambo abantwana bebehlulwe ngokwamanqanaba, uye wagqwesa usesona kwinqanaba lokuqala nakwelesibini ukuze afumane iigolide.
Ethetha neli phephandaba emva kokuphumelela kwakhe, usesona uvakalise uvuyo olukhulu, kodwa wabalula kakhulu ukuphucuka kwendlela asebenze ngayo njengeyona nto ephambili kwitumente asuka kuyo.
“Bendithathe inxaxheba kwitumente yephondo lempuma Koloni ebilapha egqeberha. Ndiqhube kakuhle kakhulu kuyo ngoba ndibuye neendebe zegolide ezintathu,” utshilo usesona ngolukhulu uchulumanco.
Ukuzuza kwakhe iimbasa kuza kuyikhuthaza kakhulu intwazana yakwatshume ekhula ngokukhawuleza kwicandelo lemithambo.
Okwenzekileyo kuhambelana ngqo namalungiselelo kasesona okulungiselela itumente yezizwe zehlabathi eza kube iseyurophu kunyaka ozayo.
“Okundichulumancisileyo kukuba kuyabonakala ukuba umsebenzi wam uyaphucuka. Kwisigaba sesibini endikuso ngoku, ndicinga ukuba zikhona izinto endiza kuzifunda. Inkqubela endiyenzileyo iyancomeka kakhulu,” utshilo usesona.
Kwitumente yakhe yokuqala, wanconywa kakhulu ngumqeqeshi wakhe ngelithi ungumntwana ozimiseleyo futhi oluncedo eqeleni ngoba uyakwazi nokubancedisa abanye abantwana.