Umalesela uzityand’ igila ngokubangela ashiye iroyal AM
EMVA kweenyanga ezimbalwa emkile, udan Malesela ubuyele kwimarumo Gallants kwakhona kule veki.
Oku kwenzeka emva kokuba ebeke phantsi njengomnye wabaqeqeshi beroyal AM kwiveki ephelileyo.
Waqeshwa kanye phambi kokuqala kwesizini eqhubekayo ngumamkhize efika kukho ukhabo Zondo abesebenza ngokubambisana naye.
Ekuqaleni khange icace eyona nto ebangele umalesela alinikele umva iqela lebhola ekhatywayo lakwazulunatal, kodwa kuye kwacaca kule veki.
“Ndibone ukuba mandihambe. Ukusebenza ngokubambisana kwabaqeqeshi asinto endiyithandayo mna. Kubakho izinto endingakwaziyo ukuzenza ngoba sisebenza sibaninzi,” utshilo umalesela ethetha nesikhululo sikanomathotholo.
“Akukhange kubekho kuphikisana ngento ethile kodwa bekuza kuthatha ixesha elide ukuze iqela lidlale ngendlela endifuna ngayo. Yiyo lo nto ndibone ukuba mandihambe,” utshilo umalesela.
Ubuyela kwigallants awayishiya kungekuhlanga kwisizini egqithileyo nangona yajika kwisigaba sokugqibela senedbank Cup.
“Kwaba lilishwa ukuphela kwesivumelwano sengqesho sikadan Malesela sabe nathi(siliqela sikhangela umqeqeshi. Emva kweengxoxo, sibone ukuba masiphinde simamkele njengomqeqeshi wemarumo Gallants,” utshilo uabram Sello, usihlalo weqela.
Umalesela uthatha indawo eshiywe nguromain Folz ohambe ekhala ngoharris Chueu awamtyhola ngokufaka impumlo emsebenzini wakhe.
Ufolz wabhengeza ukulahla kwakhe kumajelo eendaba, kodwa imarumo Gallants yathi ayazi nto kodwa emva koko yazibhekelisa kwiintetha ezenziwa nguchueu ngomqeqeshi.
Ufika ngexesha elibi umalesela imarumo Gallants isakhangela impumelelo yayo yokuqala emva kwemidlalo esibhozo eyidlalileyo kule sizini. Inamanqaku amathandathu ebhodini emva kokudlala ntanganye emidlalweni emithandathu emva kokubethwa kwemibini.
Ngomhla wesine kwinyanga ezayo, igallants iza kudibana nets Galaxy emdlalweni wedstv Premiership oza kube usembombela Stadium.