Baliphika ityala abagwetywe ubomi ejele
INKUNDLA ephakamilyo yasegqeberha igwebe ubomi neminyaka elishumi elinesihlanu, amadoda amabini, ulwando Lengisi, 33 kwakunye nosimphiwe Tame, 26, abadubula babulala unogada kwakunye nomqhubi wemoto ethutha impahla yendlu.
Esi sibini sifunyenwe sinetyala lokubulala kwanelokuphanga.
Ngokwengxelo ephuma kwigunyabantu lezotshutshiso, ngomhla wesixhenxe kweyesilimela 2019, lo nogada udutyuliweyo wayeceliwe ukuba akhaphe umqhubi ohambisa impahla yendlu kwilokishi yasezwide ngethuba behlaselwa sesi sibini sabarhanelwa.
Kuvakala ukuba kwavela amadoda amathathu sele ehlasela amaxhoba ngompu, unogada wabhubha kwangoko ngelixa umqhubi yena wabhubhela kwindlela eya kwisibhedlele idora Nginza ngokoncedo lomhlali wasezwide.
Uphando lwamapolisa lwakhokelela ekubanjweni kukalengisi, utame kwakunye nowesithathu umrhanelwa ongazange alixoxe yena ityala.
Bobabini phambi kwenkundla zange balivume ityala baphika, besithi babona okwenzekayo kodwa babezidlulela ngendlela.
Uahmed Rafick wabeka ubungqina etafileni obubophelela esi sibini nobaye baveza ukuba banalo ityala.
Owesithathu umrhanelwa ongachazwanga ngagama waye wabhubha edutyulwa kwesinye isiganeko lingekaxoxwa eli ityala.
I-NPA iyasamkela esi sigwebo.