Ubuyiselwe ekapa engaxelelwanga yidowns
KWIVEKI ephelileyo kuvalwe isigaba sokuqala senyoba yokuthengwa nokuthengiwa kwabadlali kwidstv Premiership. Akukho nto ingako eyenzekileyo ngaphandle kwamaqela amabini ngoba amaqela amaninzi athenge abadlali phambi kokuqala kwesizini.
Ukermit Erasmus obengekadlali kule sizini uthathwe yiorlando Pirates.
Kanti okuthe kothusa kakhulu kwinkampu yemamelodi Sundowns kukuhamba kukalyle Lakay emva kokuthengwa kukaterrance Mashego kwicape Town City.
Ulakay kuthiwe makakhwele ebhasini abuyele ekapa kungekho ngcaciso ayinikiweyo ngabaphathi besundowns okanye abaqeqeshi.
Konke oku kwenzeke emva kokuba ujohn Comitis ethengisele isundowns umashego ebingamdingi emva kokufunwa yikaizer Chiefs nepirates ekubonakala ngathi ebengafuni ukuzithengisela.
Ekuqaleni kwale veki, ulakay uxelele ISAFM Sport ukuba kwathiwa makaye ekapa kungekho nto ayicaciselweyo ngaphandle kwento engagcwelanga awayixelelwa ngurulani Mokwena.
Ulakay uye kwicape Town City ngemboleko yonyaka omnye kodwa isivumelwano sakhe sengqesho siyaphelelwa kunyaka ozayo.
“Wonke umntu wothusiwe kukuhamba kwam. Nam kundothusile kakhulu,” utshilo ulakay encokoka kunomathotholo WESABC.
“Ndazigqibela ndisegoli, kwasa ndixelelwa ukuba mandilungiselele ukuya ekapa. Ayisosigqibo sam, mna ndaxelelwa ukuba mandiye kwicape Town City. Khange ndinikwe thuba lokukhetha indawo endifuna ukuya kuyo.
“Bendisafuna ukuhlala kwisundowns ndilwele indawo yam eqeleni. Ngethuba kufika umodiba nongobeni ndayilwela indawo yam. Mhlawumbi izinto zibe lula kuba ndibuyela kwiqela eyandithatha kulo isundowns. Sendiyixolele yonke into ngoku. Zange ndithethe nabaqeqeshi. Umqeqeshi endithethe naye ngurulani ongathethanga nto icacileyo,” utshilo ulakay.
Abantu abaninzi batyhole isundowns ngokuthenga umbumbumbu kuba ingafuni amanye amaqela afumane abadlali abasemgangathweni ophezulu njengayo. Iyikhanyele kodwa lo nto kwiiveki ezidlulileyo ngelithi abadlali bayazifunela ukuya kwisundowns.
Umqeqeshi wecity, ueric Tinkler, ukuvuyele kakhulu