Lifikile ixesha lokukhula kwespringbok Women!
AYIFIKANGA igalelekile itumente yehlabathi yombhoxo. Ukusukela ngomgqibelo umhla wesibhozo, amawakawaka abalandeli bombhoxo baza konwabela imidlalo yamazwe ngamazwe ehlabathi eswantsulisana kweyona tumente inkulu enew Zealand.
Iqela lelizwe lomzantsi Afrika lombhoxo, ispringbok Women, liza kudibana etshatshalazeni nefrance emdlalweni wokuvula.
Lityeli lesithathu ispringbok Women sithatha inxaxheba kwitumente yehlabathi.
Zange ziwuhambele kakuhle izinto kweyokuqala, kodwa ngoku unolusindiso Booi ubetha phantsi ngenqindi ngelithi lifikile ixesha lokuziqaqambisa komzantsi Afrika embhoxweni wamanenekazi.
Ubooi uthi wayekhona kwitumente yokuqala nakubeni wayesemtsha embhoxweni, kule uya kuyo ukhona umahluko ngoba ungomnye wabadlali abanexesha elide bedlalela ispringbok Women.
“Le yeyona ndiyivayo kunezinye ngoba sendikhulile ngokwasemdlalweni kwaye ndiyayazi nendlela iqela eliyihambileyo ukuze lifike kwindawo elikuyo ngoku,” utshilo ubooi.
“Ngoku ndiyayazi indlela ebaluleke ngayo le tumente nendlela engawufunqula ngayo umbhoxo wamanenekazi ekhaya emzantsi Afrika xa izinto zinokusihambela kakuhle. Ukwenza kwethu kakuhle kwitumente yehlabathi ikholelwa kwelokuba kungawakhuthaza amantombazana aselula ekhaya futhi bangabona ukuba likhona ikamba elihle xa umntu ekhethe ukudlala umbhoxo.
“Eli lithuba lethu lokuziqaqambisa nyhani,” utshilo ubooi kwindibano yookapteni abebedibanele eauckland.
Kumaqela alishumi elinambini aza kudlala itumente yalo nyaka, umzantsi Afrika awukho phakathi kwamaqela anikwa ithuba lokuphumelela iindebe.
Amaqela anamandla embhoxweni yingilane nefrance kodwa umzantsi Afrika unabadlali abanokuyiguqula lo nto.
“Sakube sidlalela ilizwe lethu. Kufuneka senze umsebenzi obonakalayo ngaphezu kokucula umhobe wesizwe nokubaleka ebaleni. Kufuneka sibabuyekeze abantu abasibukeleyo ngomgqibelo. Siyazi ukuba ifrance inamandla kodwa ke nathi sinawo amandla,” utshilo ubooi.