Ibekwe phezulu impuma Koloni yiec TVET 7s
IMPUMA Koloni iphinde yazibonakalisa ukuba ngokwenene yindawo enamandla emdlalweni wombhoxo apha emzantsi Afrika.
Oku kucace gca okwekati emhlophe ehlungwini ngethuba IEC TVET 7s ibuya umsila uphezulu kutshanje emva kokutshatshela kwitumente yombhoxo ekuthiwa yicollege Sport Arts and Culture South Africa (Cosacsa).
Abadlali beqela ebelimele impuma Koloni bachongwe kwiikholeji ezahlukeneyo.
Uxanduva lokuqeqesha amakhwenkwe belinikwe amadoda amabini, usomila “Soso” Mkiva noluntu Mrharha. Iqela likamkiva nomrharha lenze ezibukwayo erhawutini kwitumente yombhoxo wabadlali abasixhenxe edlalwe ngamaqela aphuma kumaphondo asixhenxe emzantsi Afrika.
Kusuku lokuqala, IEC TVET 7s ibethe iwestern Cape ngo24-12, yavuthulula impumalanga ngo355 phambi kokungcwaba inorthern Cape ngo40-0.
Kusuku lwesibini, IEC TVET 7 yacambalalisa ifreyistata ngo295. Kuyiwe kusuku lwesithathu sekucaca ukuba impuma Koloni ayinantanga kodwa abaqeqeshi khange bavume abadlali bayekelele umxakatho.
Emidlalweni yokugqibela, IEC TVET ingombe kanobom inorth West ngo64-5 yaze yavala ngelimpopo ngo54-5.
Iziphumo ezihle ezifumeneyo zihambelana ncamashi nendlela abaqeqeshi nabadlali abebeyilungiselele ngayo itumente kwaye bonwabe kakhulu.
“Sonwabe kakhulu singabaqeqeshi nabadlali. Indlela esilungiselele ngayo yiyo esinike iziphumo ezihle kwitumente esisuka kuyo,” utshilo usoso.
“Besilala ekuseni ngezinye iimini sithetha ngombhoxo nabadlali siwoyamanisa nezinto ezenzeka ebomini bethu. Ngalo ndlela besizama ukubethelela injongo yethu kula tumente.
Besingafuni abadlali bethu bacinge ukuba izinto ziza kubalula. Indlela esiqhube ngayo ebaleni ichaza amalungiselelo wethu abemahle kwaye kuyibeke phezulu nempuma Koloni. Italente sinayo apha noxa ifuna abantu bokuyilungisa ukuze igqame,” utshilo usoso, okwathe ufuna abantwana bayazi into yokuba iikholeji zinalo ixabiso futhi namathuba akhona kuzo.