Ithemba ngokuvulwa komgodi osecacadu
KUKHO ithemba elitsha lokuba ungavulwa umgodi wamalahle oseguba, ecacadu kumasipala wasemalahleni, emva kokuvalwa iminyaka engaphezu kwemihlanu.
Lo mgodi ugqibele ukusebenza ngethuba bekukho inkampani ielitheni Coal Mine neyathi yaneengxaki zokuqhubela phambili ukuvelisa eli lahle.
Ukuvulwa kwakho kwalo mgodi kuvele kwintlanganiso kasodolophu wasemalahleni unontombazana Koni kwakunye nabezoshishino kwiveki ephelileyo.
Ukoni uzibone enyanzelekile ukuba axelele oosomashishini basemalahleni ngokuqhubeka kula mgodi emva kwemibuzo ibigudle inkqubela kula mgodi.
“Nangona bendingazimiselanga kuthetha ngale nto, kodwa kuba sele ivelile, mandinazise ke ukuba ngoku ndiphendula umnxeba, bandixelela ukuba kukho okuqhubekayo malunga nokuvulwa komgodi,” kutsho ukoni.
Kwindibano yesidlo sakusasa noosomashishini, ukoni, ephelekwa ligqiza eliphezulu elilawula kumasipala wasemalahleni uphendule imvula yemibuzo logama ebekwanika ingcaciso koosomashishini.
“Kukho intlanganiso eza kubanjwa neenkosi, nathi singumasipala noluntu ngokubanzi, kuze kwaziswe inkampani entsha eza kuvula lo mgodi wamalahle useguba,” enethemba utshilo ukoni.
Ngenxa yokuzenzela kwabahlali kweli lahle, lo mgodi unazo iingxwelerha ezibangelwa kukungena kuwo ngokungekho mthethweni. Ukanti amafama wemfuyo nawo akhe afelwa yimfuyo ngenxa yokungcola kwamanzi leli lahle kwimilambo yaseguba.
Inkampani ielitheni Coal Mine iqale ukomba ilahle eguba ngonyaka ka2014. Emva kwexesha elifutshane iqalile yaba neengxaki ezabangela ukunqumama kwayo.
Oyimanejala ejongene nophuhliso lwezemali kumasipala wasemalahleni, unkululo Mntuyedwa, uxelele oosomashishini ngeenzame zabo zokuvulela ukusebenza kwalo mgodi.
“Ingxaki nathi asifuni kuthetha into esingayaziyo nokuba iza kwenzeka okanye ayizukwenzeka, kodwa sikholelwa ukuba side siqiniseke ukuba ngenene ikhona into yokuba kuza kusetyenzwa phaya, zininzi iinzame esizenzileyo ukuzama ukuqinisekisa ukuba kuyasetyenzwa kula mgodi,” utshilo umntuyedwa.
Umgodi wamalahle eguba kukuphela komgodi okhoyo kweli lempuma Koloni nowathi wafunyanwa ngonyaka ka1838 kusenziwa iinzame zokufumana amandla ombane.
Eli lahle laqala ukombiwa ngonyaka ka1870 kwidolophu yasemolteno emva kweengxoxo ezabambezela ukuveliswa kwalo.
Impuma Koloni ikwindawo yesithathu ukubanomgodi wamalahle kweli lomzantsi Afrika. Kwindawo yokuqala liphondo lasekzn lilandelwa liphondo lasempumalanga ngokuvelisa ilahle.
Kunyaka ophelileyo ipalamante kazwelonke ekapa yaxoxa ivumelana kwelokuba ukubuyiswa kwalo mgodi kungasisisombululo kwiingxaki zokucima kombane emzantsi Afrika.
Ingxelo yebhunga elijongene nezimbiwa kweli ithi ngamalahle akumyinge wamakhulu amahlanu anamashumi amathathu ezigidi zeetoni aphantsi komhlaba iguba, Indwe nasemolteno.
Le ngxelo idiza ukuba yimali eqikelelwa kwikhulu elinamashumi amabini anesibini eebhiliyoni imali enokuzuzwa ngumzantsi Afrika ngokuveliswa kweli lahle.
Ukuvulwa kwalo mgodi kungaguqula imeko yezemali yasemalahleni needolophu zayo nanjengoko kukho izinga eliphezulu lentswelangqesho.
Uninzi lolutsha emalahleni luxhomekeke kwizibonelelo zikarhulumente, abo banethamsanqa baphangela kwiivenkile zokutya ezikwidolophu eziquka Indwe, Cacadu nedordretch.
Abanemfundo ephakamileyo bayemka kulo Masipala minyaka le besiya kukhangela imisebenzi engcono kwezinye iindawo. Inkampani yakwaanglo Gold iyakungqina ukuba baninzi abasebenzi basemigodini abaphuma kumasipala wasemalahleni.
Ngenxa yokudendwa kwabantu emigodini, baninzi abo banokuthatha inxaxheba kulo mgodi besebenzisa amava abo abawafumene emigodini eserawutini.