‘Uphelele, awushoti nganto’
LO ngumyalelo odubula kumgodi wegolide wengqondo kagqirhalwazi Athambile Masola.
Nakubeni lo myalelo unokubhekisa nakubani na, abaphulaphuli bakhe abaphambili ngoogxa bakhe, umzi wasetyhini, nekuphawuleka ukuba abanye abaziboni ukuba uyigolide (umq. 8 & 9).
Lo myalelo uvela kumbongo kagqirhalwazi
Masola othi
‘Izwi Elidala’ noyinxalenye yengqokelela yemibongo yakhe.
Le ngqokelela uyipapashe kwincwadi yakhe yokuqala yemibongo ethi Ilifa, nepapashwe ngabakwa-uhlanga Publishers kulo wama2021.
Phakathi kwemiyalelo enikwa amanina, kuvela lo kamasola unomahluko.
Ukuze ubuqonde ubunzulu balo myalelo, ziphe ithuba ufunde umbongo kamasola kule ngqokelela yakhe othi ‘Umyalelo Wentombi’.
Mandikukrobise ngesitanza sokuqala nesesithathu: ovuselela igugu neqhayiya, ukuzingca nokuzingomba isifuba kwendlu yasetyhini.
Iyamemelela le nzwakazi ibuchopho benziwe ngegolide, ngelizwi elenza umpongampo, isenjenje kwisitanza sesibini nesesithathu:
Isitanza ngasinye siphahlwe yimpinda ethi “Ekuqalekeni ube ekho ulizwi”.
Lo kamasola uchila, aheshe oku komshologu ukuzidela nokunyongoba okwambethe abathile bendlu yasetyhini.
Uyaqaphula, ahlikihle ngomhlabelo obomvu indlu yasetyhini ngelithi mhla baphuma esandleni sikalizwi baphuma bephelele, begqibelele, bengadingi omnye umntu ukuze baphelele.
Ngezi ngcamango, umasola uhlubulula amandla iingcamango ezithi ukuze abasetyhini bagqibelele kufuneka balandele imiyalelo emiselwe luluntu olukhokelwa ngoosolusapho, kufuneka bafumane isiqinisekiso soosolusapho abaziqelelisayo kwingqibelelo, kufuneka batshate, ngokungathi umtshato ngunqontsonqa nenqolonci yobomi.
Ewe, kaloku, imiyalelo emiselwe amantombi isoloko igxeleshe ekubeni balungele ukuba ngamakhosikazi athobela, nanyamezela oosolusapho abangookhaka kamphethu, oochoph’ emanxebeni, baxhaphe, baxel’ ixhwili, izixhamaxhama ezixhamazelayo, nezixhola zishiye.
Lithatheni elikamasola, ningalithandabuzi, lithatheni nilixhome kwigalari yeentliziyo neengqondo zenu.
Ewe, “uphelele, awushoti nganto”!