Umzantsi ugxeleshe ukubetha ifiji
IQELA lesizwe lomzantsi Afrika lombhoxo, ispringbok Women, liya emdlalweni wesibini lizimisele ukwenza umsebenzi oncomekayo noxa lingaqhubanga kakuhle emdlalweni wokuqala.
Amanenekazi omzantsi Afrika abethelwe oogqirha nezicaka yifrance ephumelele ngo40-5 emdlalweni ogqithileyo werugby World Cup ebanjelwe enew Zealand. Bekungekho mntu obelindele ispringbok Women sibethe ifrance ngoba inamandla kakhulu emdlalweni wombhoxo wamanenekazi.
Noxa izinto zingahambanga kakuhle kodwa iintokazi zomzantsi Afrika zidlale ngokukhulu ukuzinikela futhi likhona ithemba lokuba ziya kwenza umsebenzi ongcono kuneminyaka edlulileyo kwitumente yehlabathi.
Ngoku umzantsi Afrika ulungiselela omnye umdlalo oza kungquzulana kuwo nefiji ekuseni (06:45) ngecawe kwibala ekuthiwa yiwaitakare Stadium.
Umdlali wespringbok Women, ucatha Jacobs, uthe baya kwifiji beneengqondo ezihlaziyekileyo ngenxa yezinto abazenze kakuhle emdlalweni ogqithileyo.
“Iziphumo zomdlalo azingqinelani konke konke nendlela esidlale ngayo emdlalweni. Ewe, ifrance iwasebenzise kakuhle amathuba ewafumeneyo emdlalweni, kodwa siye sabuya ngamandla nathi. Ifumene amanqaku wayo ifrance kwimizuzu yokuqala yomdlalo. Kwelethu icala, sonelisekile yindlela esilwe ngayo,” utshilo ujacobs odlalela isaracens yasengilane.
Ngoku baza kudibana nefiji ebhulelwe amasaka yingilane ngo84-19.
“Zange sadlala nefiji. Lo nto ithetha ukuthi siza kudibana neqela esingalaziyo. Esikwaziyo kukuba kunzima ukuyazi into engenziwa yifiji futhi ayikwazi ukudlala xa ingekho kuyo ibhola. Ukuba singawulawula umdlalo phambili, ndiqinisekile ukuba siza kuqhuba kakuhle emdlalweni. Kubalulekile ukuqinisekisa ukuba sigcina ibhola ikuthi ukuze siyoyise,” utshilo ujacobs.
Noxa kungekho nto ingako eyaziwa ngayo ifiji kodwa ingawonzakalisa umzantsi Afrika ekulindeleke uphumelele ukuba udlale ngendlela yawo yesiqhelo.
Kufuneka ispringbok Women ukuphumelela sifumane nebhonasi ngempelaveki ukuze kwande amathuba okudlala ixesha elide kwitumente yehlabathi.