Ziyihambela kakuhle izinto icity Lads

IQELA lebhola ekhatywayo lamanenekazi, ithunderbirds Ladies, kulindeleke ukuba lihambe nzima kakhulu xa lidibana nefirst Touch FC emdlalweni wehollywoodbets Super League oza kube ungentsimbi yesithathu emalanga ngecawe.

Abaqeqeshi bethunderbirds banomsebenzi omkhulu ekufuneka bawenze wokuphakamisa umoya wabadlali emva kokubethwa emidlalweni egqithileyo ngokulandelelana.

Phambi kwekhefu elide, ithunderbirds ibethwe yibloem

Celtic Ladies ngenqaku elinye eqandeni, kanti komnye ivuthululwe yimamelodi Sundowns Ladies ngamanqaku amane eqandeni.

Ngaphandle kwamanqaku afakwa kuyo, ithunderbirds iyasokola kakhulu kwicala lokufaka amanqaku.

Akungeke kube yinto elula ukudibana nefirst Touch ekhangela impumelelo. Ingakumbi emva kokuba ibethwe yicity Lads ngamanqaku amabini eqandeni emdlalweni ogqithileyo.

Iyabetheka ifirst Touch kodwa ingxaki yethunderbirds kukubabuthuntu beefolosi zayo. Elinye iqela lasempuma Koloni, icity Lads, lithe chu ngcembe nokuqokelela amanqaku apheleleyo.

Iyancomeka lo nto emva kokusokola ixesha elide lingafumani iziphumo ezincumisayo. Emidlalweni emibini edlulileyo, icity Lads iye yafunquka emva kokubetha ivasco Da Gama ngamanqaku amabini nefirst Touch ngamanqaku amabini ngokulandelelana.

Emva kwamashumi amabini anesibini emidlalweni, icity Lads iqokelele amanqaku alishumi elinesibhozo kwaye ihleli kwindawo yeshumi elinambini.

Xa idibana NEJHB FC kwiveki ezayo ngolwesithathu, iza kufuna enye impumelelo ukuze ibhekele ngakumbi emaqeleni asemsileni.

Kweminye imidlalo yehollywoodbets Super League: ima-indies idibana nebloem Celtic, idurban Ladies idibana netsunami Queens, IJWV FC ihlangana nesundowns Ladies, igolden Ladies yamkela irichmond United, icoal City Wizards yamkela ITUT Ladies ize yona ivasco Da Gama iqubisane neuniversity of the Western Cape.

Yonke imidlalo iza kudlalwa ngecawe.