Ubavuma ubavale umlomo ngekhulu lemitsi
UKAPTENI weqela lesizwe leqakamba lomzantsi Afrika, utemba Bavuma, ubavale umlomo abachasi bakhe emva kokuqhokra imitsi elikhulu elinethoba ekuqaleni kwale veki.
Oku kwenzeke ngethuba umzantsi Afrika ubetha Amangesi ngoothinti abahlanu emdlalweni wosuku olunye.
Iindwendwe zikhutshwe zonke ziqhokre amakhulu amathathu anamashumi amane anesibini emitsi kuwe phantsi oothinti abasixhenxe.
Wangena umzantsi Afrika waphendula ngokuqhokra amakhulu amathathu anamashumi amane anesixhenxe. Kuloo mitsi, ikhulu elinethoba lemitsi lenziwe ngutemba Bavuma eyedwa kwiibhola ezithe kratya kancinci kwikhulu.
Indlela adlale ngayo ubavuma wayigqibela kudala kwiqela lesizwe.
Kuye kwaphunguleka uxinizelelo olusemagxeni wakhe ngenxa yokungaqhubi kakuhle kwakhe okuye kwamenzela umkhoka kubagxeki abachasa ukunikwa kwakhe isikhundla kwangomhla wokuqala.
Ukudlala kakuhle kwakhe ubavuma kunefuthe lomqeqeshi omtsha, ushukri Conrad, umqeqeshi awakhe wasebenza naye ngaphambili.
Emva komdlalo emangaung Oval, naye ubavuma ukwazile ukukhupha ngaphakathi izinto ebezikade zimsinda.
“Bekunzima kakhulu kwezi nyanga zigqithileyo. Kodwa ke ndicinga ukuba ndincedwe kukuzityanda igila kumqeqeshi endiye ndamxelela indawo endizibona ndikuyo rmdlalweni wam,” utshilo emva komdlalo.
“Ngoba ndikhe ndasebenza
noshukri ngaphambili, kundincede kakhulu. Nguye ondincedileyo wandibonisa indlela yokuqubisana nabantu abenza ingxolo.
Uye waqinisekisa ukuba ingqondo yam ndiyibeka emdlalweni, hayi kwezinye izinto. Kundincedile ukunika kwakhe indlebe nokwamkela izinto endimxelele zona. Yinto enkulu ukulungela umdlalo ngokwasengqondweni. Ndichulumanciswe yindlela yokwenza izinto ecacileyo andibonise yona encokweni yethu,” utshilo ubavuma ovumileyo ukuba uxinizelelo belumsinda kakhulu, kodwa ukwamkele oko njengento ehamba nokuba ngumdlali ophambili kwiqela lesizwe.
Umzantsi Afrika uyibethile ingilane emidlalweni yosuku kulo nyaka mtsha nangona bekusekho omnye umdlalo izolo esishicilele iphepha ungekapheli.