Bazali zijongeni iindawo abaziqeqesha kuzo abantwana benu
KWIZIGABA zawo umdlalo wamanqindi, kukho isigaba esiqala kwabaminyaka elishumi bezelwe ukuya kwiminyaka elishumi elinethoba.
Aba baquka oonoqalinkundla nabafikisayo ebomini. Basafuna ukujongwa ngothando, umonde nononophelo kwabo banikwe uxanduva.
Kulapho abaz ali nezalamane kufuneka basondele khona futhi babe yinxalenye yokwenzekayo kwiindawo abazilolonga nabadlala kuzo abantwana.
Kaloku yile migqeku eyifunda lula imikhwa engakhiyo ebomini.
Bayifunda kwabanye abadlala nabo, kubaqeqeshi babadlali kubazali nakwabo basondeleyo kubazali babo.
Kulula ke emzalini okanye kwisihlobo ukubona ukutenxa kwemfundiso enikwa umntwana xa besoloko bekufutshane nezinto azithandayo.
Sikhumbule kwakho ukuba kwezi mbethimanqindi, siquka namantombazanana aseze ngobuso elizweni.
Sonke siyazazi iingxaki ezijamelene nabo ingakumbi ekuhlaleni.
Kungoko kufuneka sibazi nzulu abaphethe abantwana bethu singapheleli ekubeni ngabaqeqeshi.
Esinye isigaba esifuna ingqwalasela emandla kulo mdlalo wamanqindi sisigaba sabaqala ukungena kudidi labahlawulwayo.
Esi sigaba sinento yokwenza nemali efunwa ngumntu wonke. Zininzi izinto ezingenza butshintshe ubomi babo buye endenxe ukuba akubekwa liso lokhozi kubo.
Ukuba ezi mbethimanqindi azikhuselwa, zinqwanqwadwe ngabazali, zingaxhatshazwa futhi zihluthwe intlaka emlonyeni ngabazondelele ukumosha.
Kuyo yonke le mizamo yokukhuselwa kwezi mbethimanqindi ngabazali, nabo bangazishiyi ngemva xa bejonga izimilo ezinemihlisela ekuphuhliseni izakhono zeembethimanqindi.
Abazali banoxanduva lokuqiniseka ukuba banikeza inkxaso hayi inkcaso kubaqeqeshi nabaphathi bejonge iimfuno zembethimanqindi.
Kufuneka beqinisekisile ukuba batya ngexesha elifanelekileyo nezinto ezifanelekileyo, balale ngexesha elifanelekileyo.
Banazo zonke izinto ezifunekayo emdlalweni. Ayindisithelanga into yamanzithinzithi oqoqosho, abazali abakhulisa ezi mbethimanqindi bebodwa, ngakumbi oomama nazo zonke ezinye izinto ezigubungele ilizwe lethu.
Kunjalo kuninzi lweembethimanqindi zethu kuzo yinkenqe ezingenokwahlukana nayo le yamanqindi.
Ziyisebenzisa njengomcimi weentsizi zabo, yenza bafumane ukonwaba kuyo.
Kungoko abazali kufuneke bebaxhasile ukuze bangaweli kwizandla zongendawo kuba sakha ikamva nesizwe sangomso.
Boomalume nezinye izalamane, makuphakanywe kuyokukrotywa apho umntwana ezilolongela khona.
Makungavunwa sekuvuthiwe kodwa khange sityale. Masakhe iimbethimanqindi ezinesiseko esiqinileyo ukuze sixhwithe kuso ngomhla kaxakeka.