Umajola uwongwe ngomsebenzi weenyembezi
UNINZI lwamaxhoba, ahlukumezekileyo, ahluphekayo nabulawelwa abantwana ngokungenalusini ngeluphela lungancedakali ukuba umbutho wekhula Community Development Project ubungekho, oku kudizwe ngabalandeli nabathandi bowasungula lo mbutho upetros Majola ngethuba efumana iwonga kwinkulubaphathiswa yasempuma Koloni, uoscar Lubabalo Mabuyane, kwi
Batho Pele Service Excellence & Innovation Awards ebezise Hemingways emonti ngempela veki.
Umajola noyinzalelwane yasengqushwa, ugubhulule amabali amaninzi kwaye abuhlungu ekungekho lula ukuba ubani afikelele kuwo, encedisa urhulumente wasempuma Koloni.
Uninzi luncedakele lungenalo nethemba ngenxa yakhe.
Umajola ebalisela I'solezwe emva kokufumana eli wonga likhethekileyo, uthi ngoba busuku walala encume olukablankethe.
Uthi angekhe uluntu lukholelwe ukuba naye ukhe azivalele, asitsho isikhalo ngenxa yeengxaki zabantu nangeminxeba ayifumanayo emxelela ngeendaba ezimasikizi ezishiy' amehlo.
Ezo ziganeko ubalule eso sokukhandwa ngehamile kwabantwana abane ngunina wabo obazalayo engcobo kunyaka ophelileyo.
Uthi ezo zimshiya intliziyo isukile esihlalweni sakhe de angarhaleli nokuphendula ifowuni xa ikhala.
“Ingqondo iye ingazinzi kwaye nentliziyo isuke esihlalweni. Ndifuna abantu bayazi xa sifikelele kwezi ndawo, xa sibhala okanye senze ividiyo asenzeli ukuhlekisa ngeengxaki zabantu, noba kuthwa usuka phi soze abekho onokuhlekisa ngeengxaki ezinje. Unobangela sukuba sifuna ukunceda abantu kwaye ifikelele kwindlebe efanele ukufikelela kuzo ingxaki, kuze ixhoba lifumame ukuncedakala,” utshilo umajola.
Uthi kulo msebenzi wakhe uva kamnandi kwaye uye alale encumile xa kuthe kwancedakala umntu.
Uqhube wathi okubalulekileyo yintsebenziswano norhulumente, akukho nto ilwisayo njengoko esithi uye ancome xa elo sebe lithe laphakama emva kwesankxwe.
Okamajola uqhube wathi ukuwongwa kwakhe ukuthatha njengokuba uthunywe njengesicaka.
Uthi eli wonga liza njengomngeni kuye kuba lakufuna aphakamise nangaphezu kokuba ebephakamisa kumsebenzi wakhe, kungenjalo lakuthi limnike amandla okunqwenela ukuba enze nangakumbi.
“Siyibekele ecaleni ke imingeni ejongana neengo, ndivuyela ukuba ndingakholisi ezam iimfuno kodwa ndisebenzele uluntu lwasempuma Koloni kwenzele kusuleke iinyembezi kwabo balilayo. Andifunukuxoka, umsebenzi mkhulu kwaye mninzi, abanye bade bacinge sibaphakamele xa singade siphendule kanti ngumthamo weengxaki.”
Inkulubaphathiswa uoscar Lubabalo Mabuyane uthi abantu abafana nomajola ngabantu abancomekayo abafuna ukuthathelwa ingqwalasela.
“Olu lusuku olubalulekileyo apho siqwalasela abantu abenza utshintsho kwiimpilo zoluntu kwiphondo, apho benza okuncomekayo ekuhlaleni,” utshilo umabuyane.