Kuphandwa udushe olwenziwe yijeffreys Bay
AMAPOLISA Ayaphanda isehlo esishiye konzakele abantu esenzeke emva komdlalo wombhoxo obuphakathi kwejeffreys Bay neport Elizabeth Harlequins kwiveki ephelileyo.
Iingxelo zithi abadlali beharlequins abathathu bangeniswe esibhedlele emva kokonzakaliswa ngebhotile ebukhali ngabalandeli bejeffreys Bay abambonzeleke ebaleni emva kokuphela komdlalo. Konke oku kwenzeke emva kokuba iharlequins ibethe ijeffreys Bay ngo24-22 emdlalweni we-eastern Cape Super 14.
Umongameli we-eastern Province Rugby Union, umaasdorp Cannon, ungqinile ukuba ngokwenene bonzakele abadlali beharlequins emva kokuhlaselwa ngabalandeli bejeffreys Bay ebethiweyo emdlalweni.
Embalini yayo ieastern Cape Super 14, zange yanaso isiganeko esifana nesenzeke kwiveki ephelileyo.
“Ukhuseleko lwabadlali nababukeli bomdlalo wombhoxo lubaluleke kakhulu kuthi,” utshilo ucannon kwingxelo ebhaliweyo ayikhuphe ngomvulo wale veki.
Umongameli wesouth African Rugby, umark Alexander, uligxeke kabukhali udushe olwenzekileyo, watsho ememelela isohlwayo esiqatha. “Into esiyibonileyo iyothusa kakhulu. Siza kubhalela umbutho olawula umbhoxo empuma Koloni ukuze usinike ingxelo egcweleyo,” utshilo umongameli.
“Ukuba iingxelo esizivileyo zichanekile, kufuneka kuthathwe inyathelo eliqatha kakhulu. Emdlalweni wombhoxo kuyagilwana kakubi kodwa emva kwawo kuya xhawulwana kulityalwe ngezo zinto.
“Leyo yinto esiziqhenya ngayo embhoxweni. Ubundlobongela esibubonileyo akufuneki sibunyamezele ngokuba busifaka ehlazweni,” utshilo umongameli wombhoxo emzantsi Afrika.
Yonke imidlalo yayo ijeffreys Bay imisiwe kude kugqitywe uphando.
“Kukho isehlo esenzekileyo esifikileyo ezindlebeni zethu esichaphazela iqela lenu,” itshilo incwadi ebhalelwe abaphathi bejeffreys Bay.
“Kuthiwa emva komdlalo kwenzeke udushe olushiye abantu bonzakele. Isigqeba SEEPRU sigqibe kwelokuba sinixelele ukuba yonke imidlalo yenu yasekhaya inqunyanyisiwe. Kwakuhlala kunjalo kude kusongwe uphando,” utshilo ucannon. Isohlwayo esiqatha silindeleke emva kophando lwamapolisa.