MASIVALE UMSANTSA PHAKATHI KWETHU NEMINYE IMIDLALO
KUKHO ixesha emzantsi Afrika apho amanqindi ayebekwa kwindawo yesibini ngobunganga emva kwebhola ekhatywayo. Intshisakalo nenkxaso yalo mdlalo yayikho nkalo zonke.
Sasinamaqhawe esasiwahloniphile egcwalisa amabala emidlalo. Iimbethimanqindi ezinjengohappyboy Mgxaji, Dingaan Thobela, Brian
Mitchell, Welcome Ncitha, Jackie Gunguluza, Vuyani Bungu nabanye.
Zonke ezi mbethimanqindi zazikwazi ukugcwalisa amabala emidlalo zize nabalandeli abangaphaya ko20 000. Ndiyazi ukuba yonke imidlalo ichatshazelwe kukudodobala kwenkxaso kubabukeli nokungangqishi ngesantya samandulo, kodwa kweli lamanqindi icala kwehle ngamandla. Kungoko kufuneka sikhangele umhlonyane wokubuyisela izinto emendweni.
Nazi iintsika emaziphakanyiswe ukuza nesisombululo: Usasazo olunomtsalane, nokuba ngababhalimaphepha, unomathotholo okanye umabonakude, mabazame isakhono sokuqokelela iindaba nezinto ezinika ithemba ngalo mdlalo. Sifuna esa sakhono sabasasazi ababekwazi ukuzoba umfanekiso uwubone usekhaya okanye ukuba ubukele kumabonakude uzibone uphaya. Abasasazi ababezincoma iimbethimanqindi de kuvuke umnyele, ubani azive efuna ukuya kuzibonela. Ngexesha lomlo ezi ncakuba ziza kuphakela ingqaka yolwimi olukunika umfanekisongqondweni owenza ubesemlweni.
Ixesha: Imilo mayisuke ebusuku ngentsimbi yeshumi kuba ikhuphisana nezinye izinto kungekho sidingo, kaloku ixesha langolwesihlanu ngentsimbi yeshumi abantu abatsha bakwiindawo zolonwabo, abadala sebebeke icala. Kwaye uninzi lwabathandi bamanqindi zimpula zikalujaca ezixhomekeke kwizithuthi zikawonkewonke ukuze zikwazi ukuya zibuye emidlalweni, azinayo imali yokuqesha iindawo zokulala xa kuphunywe ezinzulwini zobusuku. Kungoko ixesha lokuhamba kwezithuthi zikawonkewonke kufuneka uselwe iso.
Abathelekisi: Amaxesha amaninzi bafuna ukunyusa iimbethimanqindi zabo zilungele ukuya kwisitha segolide. Ukufezekisa le njongo kukhangelwa iminyolwa ibhityise umdla kubabukeli kwaye isengele phantsi izinga letumente. Sifuna abathelekisi abangoyikiyo ukuza nemilo evusiza izinkcwe maxa onke nokuba ubukele kumabonakude ekhaya, ungagungqi. Bawuhombise umsitho ulungele ababukeli nabaxhasi.
Abaxhasi: abaxhasi abayifuni indawo enesiphithiphithi okwamanqindi osana, koko bafuna uzinzo ukuze bafake inkxasomali. Amabali abonisa izimilo ezinemihlisela aphuma rhoqo ezindabeni ayawabalekisa abaxhasi.
Iimbethimanqindi: Zinegalelo ekukhuliseni okanye zinciphise inkxaso yalo mdlalo ngendlela ezenza ngayo izinto. Izinto abazenza esidlangalaleni ezingentlanga zingenza abanye abantu nabaxhasi bazichaselanise nalo mdlalo.
Abaphathi bequmrhu elilawulayo: uxanduva abalinikiweyo ngumthetho kufuneka bewusebenzise ngobulali, baqinisekise ukuba benza imithetho yokusondeza uluntu kulo mdlalo, bachubelane nabanye abaphumeleleyo kweminye imidlalo. Nam ndizama ukuphosa ilitye esivivaneni ndibundukunya ibuyambo kulo mdlalo.