Ichippa ingasengxakini yisekhukhune
NJENGESIQHELO, ichippa United iphakathi kwamaqela amahlanu azama ukuphepha izembe njengokuba kuphela isizini ka2022/23. Ngenxa yokugqwidiza ekwenzileyo emidlalweni yalo nyaka nakunyaka ophelileyo, ngoku kunyanzelekile iyiphumelele yonke imidlalo eshiyekileyo ukuze isinde ezembeni.
Umsebenzi wechippa wokukhusela indawo yayo kwidstv Premiership uqala ngempelaveki xa idibana nesekhukhune United emdlalweni wedstv Premiership oza kube usepeter Mokaba Stadium ngecala emva kwentsimbi yesithathu emalanga ngomgqibelo. Ngaphandle kwamathandabuzo, umdlalo uza kuba nzima ngoba omabini amaqela abethiwe emidlalweni yedstv Premiership egqithileyo.
Iqela lasempuma Koloni libethwe ngamazulu ngamagowuli amabini eqandeni emdlalweni obusegqeberha ekuqaleni kwale nyanga yokwindla. Kanti nayo isekhukhune United ibethwe yiroyal Am ngamagowuli amabini eqandeni.
Nakubeni kunjalo - baya emdlalweni wangempelaveki bekhuthazekile emva kokuphumelela imidlalo yenedbank
Cup kwiveki ephelileyo. Noxa kunzima ukufumana amanqaku apheleleyo emidlalweni yokugqibela, ukurt Lentjies uza kuphakula kumava awafumene kwisizini egqithileyo ancede ichippa esengxakini. Ukuba ayiphumelelanga ngomgqibelo, amaqela amathathu asezantsi kwayo angayifumana.
Lo nto ingawenza nzima kakhulu umsebenzi wayo wokuzihlangula. Usengxakini naye ubrandon Truter kwelakhe icala ngoba isekhukhune ikwindawo yeshumi elinanye. Nangona kubekho ukugqwidiza eqeleni lakhe, utruter ugxeleshe indawo kwitop 8.
Ethetha emva kokubethwa yiroyal Am, utruter uthe uyakholwa ukuba isekhukhune United iza kuvala isizini ikwindawo ehloniphekileyo.
“Sisekhondweni elihle nakubeni sibethiwe emdlalweni wethu. Inkxaso iyakhula emdlalweni ngamnye. Ngoku kufuneka sibabuyekeze abalandeli ngokuphumelela imidlalo,” utshilo utruter, ekulindeleke athembele kubadlali bakhe abatsha abafana nokamohelo Mokotjo nosibusiso Vilakazi emdlalweni obalulekileyo. Imidlalo yedstv:
Lwesihlanu: Swallows vs Golden Arrows @Dobsonville Stadium, 19:30; Stellenbosch vs Amazulu @Danie Crave Stadium, 19:30
Mgqibelo: Sekhukhune United vs Chippa United @Peter Mokaba Stadium, 15:30; Orlando Pirates vs Supersport United @Orlando Stadium, 17:45; Maritzburg United vs Kaizer Chiefs @ Harry Gwala Stadium, 20:00