Isundowns isecicini lokwenza imbali kwakhona
UMQEQESHI wemamelodi Sundowns, urulani Mokwena, uzingomba isifuba ngomsebenzi owenziwe ngabadlali bakhe.
Oku kulandela emva kokuba isundowns ifake ishumi lonke lamagowuli emidlalweni emibini eyidlalileyo kwisithuba esingaphantsi kweveki.
Ekuqaleni kwale veki, isundowns ivuthulule iroyal Am ngemvula yamagowuli amahlanu kwelinye emdlalweni wedstv
Premiership obubanjelwe epitoli.
Kanti ngempelaveki egqithileyo, isundowns ihlekise ngeal Ahly eyibethe ngamagowuli amahlanu kwamabini emdlalweni WECAF Champions League obutaka iintlantsi nawo epitoli.
Yinto enqabileyo le yenziwe yisundowns ebholeni yasemzantsi Afrika - kodwa akothusi ncam ngoba umokwena wakhe iqela elidlalela ukuphumelela yonke imidlalo eliyidlalayo.
Amagowuli ephumelele ngayo isundowns afakwe ngucassius Mailula, amabini afakwe ngupeter Shalulile, umthobi Mvala nelinye elifakwe nguzakhele Ngcobo ngempazamo emva kokuphosa ibhola ayinikelwe nguricardo Nascimento.
Kanti igowuli leroyal Am lokubika ekhaya lifakwe ngulantshene Phalane kwisigaba sesibini somdlalo.
Ngoku Amasandawana abethwa ngumoya phezulu kwidstv Premiership emva kokuqokelela amashumi amahlanu anethoba amanqaku emidlalweni engamashumi amabini anesithathu ayidlalileyo.
Okunye okuthe kwabaluleka ngempumelelo ayizuze emdlalweni ogqithileyo kukuba akusekho qela elingayifumana isundowns kwindawo ekuyo. Indlela yayo yokuphakamisa indebe yedstv Premiership ityeli lesithandathu ivulekile ngoku.
“Ndiyavuyisana neqela lonke emva kokufumana iziphumo ezihle kangaka,” utshilo umokwena emva komdlalo epitoli.
“Baphantse bafaka igowuli kuqala kunathi emva kwempazamo eyenziwe ngumvala emva. Kodwa ke ndiyazingca ngomsebenzi owenziwe liqela. Umsebenzi owenziwa ngaba badlali mhle kakhulu. Bekufanele banconywe ngaphezulu kunendlela abanconywa ngayo,” utshilo umokwena osecicini lokuphumelela iindebe ezintathu njengomqeqeshi oyintloko wesundowns.