Abarhanelwa abathathu babanjiwe ngokuphanga abakhenkethi
EMVA kokuphangwa kwabakhenkethi ababini, kwasekwa igqiza, nto leyo eyakhokelela ekubeni kubanjwe ngoko nangoko abarhanelwa abathathu kwaza kwabuyiswa izinto ebezibiwe. Ngomgqibelo, umhla we18 kweyokwindla, malunga ne-00:45, kuthiwa isibini sasejamani savuswa ebuthongweni baso kwindlu yeendwendwe eaddo. Abarhanelwa abane bangena egumbini bephethe izinto ezingaziwayo besoyikisa esi sibini.
Ngokwengxelo ephuma kwisithethi samapolisa ucolonel Priscilla Naidu, le ndoda eneminyaka engamashumi amathandathu anesixhenxe
(67) waba namanxeba entloko ngethuba ibizama ukuvala ucango.
Abarhanelwa beba imali, iincwadana zokundwendwela, imali yangaphandle, nezinye izinto zexabiso.
“Iinkcukacha zobuntlola zikhokelele ekubanjweni ngokukhawuleza komrhanelwa oneminyaka engama27 ubudala kwindawo yasenomathansanqa malunga necala emva kwentsimbi yeshumi elinanye (11:30) njengoko kutyholwa ngelithi ebezama ukutshintshisa ngemali yangaphandle. Abanye abarhanelwa ababini, abaneminyaka engama29 kunye ne31, babanjwe kungekudala emva koko. Uninzi lwempahla ebibiwe yafunyanwa,” utshilo unaidu.
Abarhanelwa babanjwe ngokurhanelwa ngokuphanga ishishini nokuba nempahla ekutyholwa ukuba ibibiwe.
Ukusebenza kakuhle kweqela kuye kwanconywa ngumajor General Zolani Xawuka, umkomishinala wesithili sasesarah Baartman.
“Ukhenketho lunenzuzo ebalulekileyo yezentlalo kwilizwe lethu kwaye ulwaphulo-mthetho lunokunqanda iindwendwe ezinokubakho ekubeni ziye kwiindawo ezifuna ukuya kuzo. Oku kunokuba nefuthe elibi kwisidima seendawo ezithile ekusingwa kuzo kungoko ukuze kugcinwe kwaye kukhuselwe iphondo nelizwe lethu, thina njengabezomthetho kufuneka senze konke okusemandleni ethu ukuqinisekisa ukhuseleko lwabakhenkethi kunye nabemi ngokufanayo. Ndiyiqhwabela izandla impendulo ekhawulezileyo yamalungu ethu athe asebenzisa zonke izibonelelo nobukrelekrele obukhoyo ukuze kubanjwe abantu ngokukhawuleza,” utshilo uxawuka.