Unconyiwe ungxeke obethe umendoza
PEDRO MAPELO PEDRO.MAPELO@INL.CO.ZA
EMVA kwetumente yamanqindi ebibanjelwe emonti kwimpelaveki egqithileyo, ulandile Ngxeke yintshatsheli entsha. Okangexe ukuzuze oku emva kokubetha umichael Mendoza wasephillipine emlweni wentshinga YEIBO Intercontinental Junior Bantamweight ebingenamntu. Le ndedeba yasecofimvaba iphumelele kwitumente ebekuvalwa ngayo usuku lwamalungelo oluntu emzantsi Afrika.
Umsitho wamanqindi ubuzinyaswe ziinkokeli zaseburhulumenteni eziquka umphathiswa uzizi Kodwa wesebe lezemidlalo kuzwelonke, unonceba Kontsiwe okhokele isebe lezemidlalo empuma Koloni nezinye eziphuma kumasipala wasebuffalo City Metro - eqhayisa ngokuvelisa iintshatsheli ezininzi emzantsi Afrika.
Noxa ungxeke, 27, evuyela ukubayintshatsheli entsha kodwa ukufumene ebunzimeni. Umendoza, 24, ebezokulwela ukuphumelela emzantsi Afrika kodwa ngelishwa lakhe ufike ungxeke ezilungiselele.
Kwimijikelo yokuqala, umendoza uzamile ukurhwaphiliza amanqaku. Usompempe obephethe umlo, ululama Mtya, ebekhe waxakeka kucaca ukuba amadoda awisana phantsi.
Kuye kwanyanzeleka ungxeke anyuse umxakatho ukuze aphumelele. Ekugqibeleni kwemijikelo elishumi elinambini, ungxeke ubhengezwe njengentshatsheli entsha emva kokuphumelela ngamanqaku.
Abagwebi bomdlalo bathe ungxeke uqokelele amanqaku ngolu hlobo: 117/111, 116/111.
Umendoza ubuyele ekhaya ephaca futhi kufuneka asebenze kakhulu emva kokubethwa kwakhe emzantsi Afrika. Inkampani yabathelekisi, ixaba Boxing Promotions, iwuncomile umsebenzi owenziwe ngungxeke.
“Indlela ofunde ngaye umntu obusilwa naye nendlela olwe ngayo eqongeni kukusebenzele kakhulu. Umendoza ebeyingozi emdlalweni wade wayokuphela. Andithandabuzi, uqhube kakuhle kakhulu emlweni wakho wesibini wehlabathi,” itshilo ingxelo ekhutshwe yixaba Promotions egameni likaayanda Matiti.
Kweminye imilo, ulopez Maluleke udlale ntanganye nosiyabulela Hem, uqhamani Mhlana ubethe usandiso Booi, uasanda Ginqi ulahle phantsi usibusiso Zingange emlweni wejunior Lightweight. Yena ukhaya Bhusakhwe yintshatsheli emva kokuba ebethe ulusanda Komanisi oye wonzakala egxalabeni. Komnye umlo, umpumelelo Tshabalala ubethe uathenkosi Thongwana watsho wayigcina intshinga ebeyikhusela.