Ichippa idibana nepirates ngexesha elibi
Phakathi kwemidlalo eza kube ijongwe ngamehlo abomvu ngabalandeli bebhola ekhatywayo ngempelaveki, kukho lowo uphakathi kwechippa United neorlando Pirates.
La maqela mabini aza kuswantsulisana kube nzima emdlalweni wedstv Premiership oza kube ungomgqibelo ngecala emva kwentsimbi yesihlanu emalanga enelson Mandela
Bay Stadium. Iqela lebhola ekhatywayo lasempuma Koloni lijingelwa lizembe kwakhona nakule sizini. Okubi ngalo kukuba alikwazi ukuphumelela imidlalo. Ukuqhothoza kwalo kwicala lokuqokelela amanqaku apheleleyo kuko okulibeke kwindawo embi elikuyo ngoku. Lalikhona ithemba xeshikweni ichippa United iphumelela imidlalo emine ilandelelana kunyaka ophelileyo phantsi kukamorgan Mammila kodwa yaphinda yacima loo ntlantsi kwamnyama.
Iza kwamkela ipirates inethemba lokuyibetha okwesibini emva kokuyibetha ngegowuli elinye emdlalweni wokuqala. Ngelishwa, ichippa idibana nepirates ikhuthazekile emva kokuphumelela imidlalo yayo eliqela. Kodwa okuyenza ikeleme ngakumbi kukuba ifuna indawo yesibini kwidstv
Premiership ukuze ikwazi ukubuyela kwicaf Champions League. Abaluleke kakhulu kuyo (ibucs) amanqaku amathathu ngoba ibambene nesupersport United nekaizer Chiefs, nazo ezigxeleshe indawo yesibini emva kwemamelodi Sundowns esele iziintshatsheli kusashiyeke imidlalo eliqela engekayidlali.
Emva kokuba ipirates ibethe irichards Bay ngo20 kwiveki ephelileyo, ujose Riveiro, ugxininise ukubaluleka kokufumana indawo yesibini xa kusongwa isizini.
Oku ukuthetha emva kokuba ipirates iphumelele ithoba lemidlalo kwelishumi elinambini eyidlalileyo.
“Indlela elidlala ngayo iqela iyaphucuka kodwa sisekude kwindlela esifuna lidlale ngayo,” utshilo uriveiro emva komdlalo.
Ezimnyama zibambene namanye amaqela ngamanqaku noxa zikwindawo yesibini. “Akukhathaliseki nokuba leliphi iqela elikwindawo yesibini ngoku. Siyakwazi okufunekayo. Injongo yethu kukufumana indawo yesibini ukuze sibuyeke emidlalweni YECAF Champions League. Siza kuyilwela lo nto kude ibe ngumhla wokugqibela wale sizini,” utshilo uriveiro.
Kunyanzelekile ichippa nepirates zidlalele ukuphumelela. Lo nto iza kwenza umdlalo ubenzima, kodwa yichippa esengxakini kakhulu ngoba ingafunyanwa ngamaqela asemva kwayo nanini na xa ingaphumeleli.
Imidlalo yedstv Premiership: Mgqibelo: Richards Bay vs
Golden Arrows @King Zwelithini Stadium, 15:00; Chippa United vs Orlando Pirates @Nelson Mandela Bay Stadium, 17:30; Sekhukhune United vs Maritzburg United @ Peter Mokaba Stadium, 17:30; Kaizer Chiefs vs Marumo Gallants @FNB Stadium, 20:00
Cawe: Royal Am vs Stellenbosch @ Chatworth Stadium, 15:00; Swallows FC vs Mamelodi Sundowns @ Dobsonville Stadium, 15:00; Cape Town City vs Amazulu @Cape Town Stadium, 17:30*