Intlungu yokubhubha kwamagqirha esiya komkhulu!
NGOMVULO kule veki icontralesa ibhiyozele usuku lwezinyanya nolubizwa ngokuba yinational Ancestor's Day, apho amagqirha nabo bangengomagqirha kodwa bakholewa kwisintu nakumasiko beqwalasela olu suku ngokuhlonipha abangasekhoyo. Olu suku laphehlelelwa ngomhla wesibhozo kumeyi ka2021 ebushbuckrigde.
Nangona kubhiyozelwe olu suku, iintsapho ezine kwilali umangce phezu komlambo omkhulu umbhashe edutywa, zinyembezana emva kokuba zishiywe ngamalungu azo kwingozi yemoto eluhlobo lwebhaki ebilayishe amagqirha nebesiya kulo mzi mkhulu umbhashe.
Uanda Mpatuse nonguceba kuward 8 embhashe, uthi ezi ndaba zehle esendleleni eya Kwazulu Natal ngokomsebenzi. Uthi kubuhlungu kuba akakayi uyokudibana neentsapho njengoko engekabuyi, kwaye uthi kunzima nokufumana ezona nkcukacha malunga nabangasekhoyo. Umpatuse uthi zona iindaba zothusile kwaye zibuhlungu ingakumbi kumke abantu abangamagqirha abajonge kubo ngokuphilisa isizwe.
Ngokwengxelo ephuma kwisithethi sesebe lezothutho nokhuseleko empuma Kolini, uunathi Binqose, le ngozi yenzeke ngomgqibelo kwimpelaveki esisuka kuyo emva kwemini apho kuthe kwabhubha amadoda amane (4) abasixhenxe (7) babalekiselwa esibhedlele egcuwa ngelixa omnye (1) kwesa sixhenxe ngolwesibini kule veki ebalekiselwe esibhedlele emonti kuba ekwimeko embi kakhulu.
Unkosi uzwelinzima kula mmandla nowabangabanye babantu bokuqala ukufika kwindawo yexhwayelo, uxelele I'solezwe ukuba sukela la mini akalali behlayo, usebenzisa iipilisi zokulala.
Uthi ibuhlungu into eyehlele ezi ntsapho zala magqirha. Uthi aba bantu baphume beyokunyanga emzini, beyokwenza umsebenzi kanti baza kubhubha.
Uqhuba uthi la magqirha ebenentlombe kwilali yasechizela esiya emlanjeni embhashe eyokwenza umsebenzi wawo wobugqirha ngethuba umqhubi webhaki ethe waphelelwa ziziqhoboshi azafuna kusebenza yabe indlela iqengqeleka, waphulukana nolawulo yenzeka intlekele.
Ubinqose uthi amapolisa alivulile ityala kwaye uphando luyenziwa.