Kuliwa neendawo zobugebenga egqeberha
NGOMHLA wesithandathu kucanzibe, ngobusuku bangomgqibelo, umkomishinala wephondo lempuma Koloni, ulieutenant General Nomthetheleli Mene, ebekwisithili sasenelson Mandela Bay, esolathisa umkhosi wakhe kwiindawo ezinolwaphulomthetho.
Ekunye namapolisa ezithuthi ENMB kunye namapolisa kamasipala, amagosa asebupoliseni asuka kwezinye izithili zasempuma Koloni athathe inxaxheba kumaphulo akhethekileyo abizwa ngokuba yioperation Vhutu Hawe.
Ngokwengxelo ephuma kwisithethi samapolisa, ukapteni Andre Beetge, amaphulo egelvandale, ebethelsdorp, enew Brighton, Kwazakhele, nakwanobuhle ngokwahlukeneyo ebejolise kubantu abaqhuba benxilile, kwiithaveni ezingenamaphepha kwaneeshibhini, ukwanda kwemipu nezinto ezibiweyo.
“Zingamashumi amabini anesibini (22) iithaveni ezithe zatyelelwa ukujonga ukuba ziyayithobela na imithetho emva koko zavalwa ezintathu kwathathwa notywala ngenxa yokungathobeli. Amapolisa aphinde ohlutha iilitha ezingama286 zotywala kunye ne-1282 yeelitha zemixube eyenziwe ekhaya. Kukhutshwe izohlwayo ezixabisa ir36 000 apho kuqhagamshelwe umbane ngokungekho mthethweni kwaza kwaqhawuka uqhagamshelo,” utshilo ubeetge.
Ngokutsho kwale ngxelo, kubanjwe abantu abalishumi elinanye, abathandathu kubo bajongene nezenzo zolwaphulomthetho olunxulumene neziyobisi, abahlanu banento yokwenza notywala (abathathu ngokuthengisa utywala ngokungekho mthethweni, ababini ngokuqhuba benxilile).
Umene ulichaze eli phulo njengeliyimpumelelo, esithi beluzinyaswe kakuhle ngabezomthetho kwaye indlela yokuthatha inyathelo ibe nefuthe.