Uncwadi luka Vula Bula luphucula ufundo ebantwaneni
UPHANDO lakutshanje olwenziwe ngabakwa Progress in International Reading
Literacy Study (PIRLS) lubonakalise ukuba abantwana
abenza ibanga lesibini abanasakhono sokufunda. Oluphando luqhuutywe kumazwe angama-43 kwaye elomzantsi Afrika lirhuqa ezantsi kakhulu, ngowama
2016 ibingumyinge we 78% ongakwaziyo ukufunda kodwa kulonyaka lenyuke layi 81% elonani.
Ukungakwazi ukufunda kukhokelela ekubeni inkoliso yabantwana isiyeke isikolo ze ibe ngamaxhoba okumitha ze bambi baphelele entolongweni ngenxa yokubandakanyeka kwizenzo ezingendawo.
Ukukhawulelana nalengxaki abakwa Molteno Institute for Language and Literacy ishicelele ezizakufundwa kumabanga aphantsi ngeelwimi ezilithoba isixhosa, isizulu, isindebele, Sesotho, Sepedi, Setswana, Siswati, Xitsonga ne Tshivenda.
Kuzo zonke izikolo zeli abantwana bahlohlwa ngolwimi lwenkobe ukusuka kwibanga lokuqala ukuya kwelesithathu ze emva koko baqalise ukufumana izifundo ngesingesi. Iincwadi zika Vula Bula zibeka isiseko esiluqilima ekufundeni ntoleyo inika abantwana isakhono sokufunda nokuqonda okunokubangela bakwazi ukufunda isingesi.
Zonke iincwadi zika Vula Bula zibhalwe ngoncuthu lolwimi zaze zahoniswa ngemifanekiso ecacileyo, nto ezo zinika umfundi osakhulayo ithuba lokufundela ukucacelwa nenkumbulo.
Ezincwadi zezokuqala ukupapashwa kweli lomzantsi kwaye zisebenzisa ifonetiki yolwimi ngalinye. Imibhalo mifutshane kwaye lonto ikhuthaza ikwabanga umdla kulowo ufundayo.
Amabali aqulathwe apha enza kubelula ukuqonda, wenze izigqibo ngokuzimeleyo ukwazi nokusombulula iingxaki ngokulula besebenzisa ukucinga okunzulu.
Ujenny Katz, oyimanejala nomphandi we Molteno Institute for Language and Literacy uthi ezincwadi zika Vula Bula zibaluleke kakhulu ekubumbeni ingqondo
zabantwana kumabanga aphantsi.
“Zinika abantwana ubuchule bokusombulula imicelimngeni baze bafunde ngokukhawuleza nokuzithemba.”
Imolteno iqeqesha ootishala ukuba bakwazi ukusebenzisa uncwadi luka Vula Bula ngokukhululekileyo eziklasini.
Abazali banakho ukuzithengela ezincwadi bancedisane nabantwana babo emakhayeni.
Iphulo lika Vula Bula lixhaswa lisebe lemfundo kwaye liqalise ukusasaza iincwadi empuma Koloni ngowe 2019.
Iziphumo zibonakalisa ukuba ikho inkqubela phambili kuba abantwana babonakalise ukuphucuka kwendlela abafunda ngayo isixhosa ngokophando luka Ardington & Spaull.
Iincwadi zika Vula Bula kufanele zifumaneke kwizikolo zamabanga aphantsi nakwi khretshi.
Inkcazele ethe vetshe ungayifumana kwa : https:// vulabula.molteno.co.za/